«Չեմ հայհոյել, սիգնալ եմ տվել միայն». պարեկների կողմից բիրտ ուժի կիրառմամբ բերման ենթարկված վարորդը՝ կատարվածի մասին (տեսանյութ)

«Չեմ հայհոյել, ինչպես բոլորը, այնպես էլ ես, սիգնալ եմ տվել միայն»։ Երեկ համացանցում տարածված սկանդալային տեսանյութում պարեկների կողմից բիրտ ուժի կիրառմամբ բերման ենթարկված Էդգար Այվազյանը NEWS.am–ի հետ զրույցում տեղի ունեցածի մանրամասներն է ներկայացրել։

«Պապիկիս թաղման օրն էր, այնտեղ էի գնում, շտապում էի։ Մոտ 25 րոպե փակ էր ճանապարհը ու չէին ասում՝ ինչ ա կատարվում։ Հետո ենք իմացել, որ մարդ են դիմավորում։ Խառը վիճակ էր, բայց ոչ մի հայհոյանք չի եղել, ոնց որ բոլորը, այնպես էլ ես սիգնալ եմ տվել, ուրիշ ոչ մի բան»,–պատմեց նա։

Նա նշեց, որ թեև տեսագրությունը երեկ է տարածվել, սակայն դեպքը օրեր առաջ՝ մարտի 31-ին է տեղի ունեցել։

Նշենք, որ մարտի 30-ին Հայաստան էր ժամանել Գերմանիայի նախագահ Ֆրանկ-Վալտեր Շտայնմայերը, և այդ օրը ճանապարհը փակվել էր Գերմանիայից ժամանած պատվիրակության շարասյան անցումն ապահովելու նպատակով։

Էդգար Այվազյանը պատմեց, որ բերման ենթարկելուց հետո նրան ազատ են արձակել, սակայն մինչ օրս իրեն պատկանող մեքենան չեն վերադարձրել։

«Մեքենայի մասին ոչ մեկ ոչ մի բան չի ասում։ Գնում եմ, ասում են կզանգենք, ու ոչ մեկ ոչ մի բանից տեղյակ չի»,–հավելեց նա։

Հիշեցնենք, որ երեկ համացանցում տեսանյութ է տարածվել, որտեղ երևում էր, թե ինչպես են Երևանում խցանման մեջ սպասող վարորդին պարեկներն անհասկանալի պատճառով հանում մեքենայից, ուժի գործադրմամբ պառկեցնում գետնին, այնուհետև տանում անհայտ ուղղությամբ։

Համացանցում տարածված տեսանյութի վերաբերյալ պարզաբանում ստանալու նպատակով NEWS.am–ը դիմել էր ՆԳՆ մամուլի խոսնակ Նարեկ Սարգսյանին։

«Պետական արարողակարգային միջոցառումների շրջանակում, երբ ոստիկանության ծառայողները ապահովել են մեքենաների շարասյան անցումը, վարորդներից մեկը հայհոյանք է հնչեցրել: Նա բերման է ենթարկվել ոստիկանության կենտրոնական բաժին: Պարզաբանումներից հետո ազատ է արձակվել»,–հայտնել էր ՆԳՆ մամուլի խոսնակը։