Տնտեսվարողների առաջ ձևական պահանջներ չեն դրվելու. Վարդան Արամյան

Գնումների ոլորտում իրականացվող բարեփոխումները քննարկելու և ներկայացնելու համար Ֆինանսների նախարարությունն այսօր ԶԼՄ-ների ներկայացուցիչների հետ աշխատանքային քննարկում է կազմակերպել:

Ֆինանսների նախարարի տեղակալ Կարեն Թամրազյանը ներկայացրեց գնումների ոլորտում սպասվող բարեփոխումները: Նա հայտնեց, որ կպարզեցվի ու թափանցիկ կդառնա գնումների ոլորտը:

Միաժամանակ կներդրվեն տեղեկատվության թափանցիկության հաշվետվողականության, չարաշահումների հնարավորությունները սահմանափակող մեխանիզմներ:

Ֆինանսների նախարար Վարդան Արամյանն էլ հավելեց, որ ձևական պահանջներ տնտեսվարողների առաջ չեն դրվելու:

«Որքան ձևական պահանջները շատ են լինում, կոռուպցիոն ռիսկերն այնքան մեծանում են»,-ասաց Վարդան Արամյանը:

Հանդիպման ընթացքում լայն քննարկում ծավալվեց պաշտոնյաների փոխկապակցված անձանց ընկերությունների շուրջ, որոնք մասնակցում են հայտարարված տենդերներին ու հաղթում:

Ֆինանսների նախարարը ներկայացրեց, որ եթե պաշտոնյաների փոխկապակցված անձանց ընկերությունները ցանկություն կունենան և կմասնակցեն գնումների մրցույթին, անպայման պետք է ներկայացնեն սեփականատերերի մասին ինֆորմացիա:

Վարդան Արամյանը հայտնեց, թե օրենքը չի արգելում, որ պաշտոնյաների փոխկապակցված ընկերությունները մասնակցեցին մրցույթին, սակայն նրանց համար մրցույթին մասնակցելու նոր կարգ կսահմանվի:

«Այնպես չի կարող լինել, որ դու լավ առաջարկ ներկայացնես, հետո ինչ-ինչ պատճառներով քեզ դուրս շպրտեն ու չներկայացվեն դուրս շպրտման պատճառները»,- ասաց Վարդան Արամյանը՝ հավելելով, որ գնումների նոր կարգի սահմանման համաձայն՝ լինելու են բոլոր խաչաձև միջոցառումները:

Նրա խոսքով՝ այդ միջոցառումներն ավելի թափանցիկ կդարձնեն գնողին, նրա առաջարկված ծրագիրը, առաջարկված գինը և մնացած բոլոր մեխանիզմները, որոնք փաստում են, որ պետությունը գնումը կատարելուց առաջնորդվել է ի շահ պետությանը: