Հորս, որդուս ձերբակալելու արդյունքում ձեզ համարելու եք արժանապատիվ գյումրեցի՞. Մարտուն Գրիգորյանը` Սարիկ Մինասյանին

«Լուրջ մտածում էիք, որ տղայիս ու հորս ձերբակալելու արդյունքում դուք ձեզ զգալու եք հպարտ, արժանապատիվ գյումրեցի՞, ու դուք համարում եք, որ սա լավ, ճիշտ պայքա՞ր էր»,- Հանրային հեռուստաընկերությամբ Գյումրիի համայնքապետի թեկնածուների մասնակցությամբ «Նախընտրական բանավեճ»-ի ժամանակ «Մեր քաղաքը» դաշինքի առաջնորդ, Գյումրու քաղաքապետի թեկնածու Մարտուն Գրիգորյանը հարցն ուղղեց ՔՊ կուսակցության Գյումրիի քաղաքապետի թեկնածու Սարիկ Մինասյանին։

Նա նշեց, որ ողջ քարոզարշավի ընթացքում պահել է բոլոր նորմերը, կանոնները, հարգանքը։

Սարիկ Մինասյանն արձագանցեք. «Պարոն Գրիգորյան, ամենայն հարգանքով ձեր և ձեր ընտանիքի հանդեպ, որևէ առնչություն չունեմ, հստակ, ձեր աչքերի մեջ նայելով ասում եմ, նաև մենք ունենք ընդհանուր ընկերներ։ Մենք վաղն ընտրություններից հետո իրար աչքերի մեջ նայելու ենք։ Ես որևէ առնչություն չունեմ տվյալ դեպքի հետ, պակաս անհանգստացած չեմ։ Եթե իրավապահ մարմինների կողմից իրականացվել է որևէ խտրական վերաբերմունք ընդդիմության կամ իշխանության թևի ներկայացուցիչների հանդեպ, եթե լինեն նման ապացույցներ, ձեզ հետ համատեղ կպայքարեմ նման երևույթների դեմ։ Այդ փաստը, իրադարձությունն իրավապահ համակարգի տիրույթում է, որևէ առնչություն չունեմ»։

Մարտուն Գրիգորյանն ասաց. «Գիտեք՝ իմ ու ձեր տարբերությունը ո՞րն է։ Այն է, որ եթե ես լինեի իշխանության ներկայացուցիչ ու այս ընտրապայքարի ընթացքում եթե հանկարծ իմ իշխանական թևը, ղեկավարությունը փորձեր մեկի խաթրին կպներ այսպես անարդար, անլուրջ, ես հաստատ այն տղեն կլինեի, որ կդնեի այս ամենը կողքի, դուրս կգայի, գյումրեցուն ցույց կտայի, որ ես քաղաքի, կյանքի տղա եմ, թույլ չեմ տա ոչ մի քաղաքական խաղի մեջ ինձ ներքաշեն ու այնպես անեն, որ այս քաղաքում գլուխս կախ ման գամ։ Դուք այսօր դա պետք է կարողանայիք ապահովել։  Գիտեմ՝ ձեզ համար շատ ծանր բան է, այսօր ձեր թիմը ձեր թիկունքից շատ լուրջ հարվածեց։ Գյումրեցիներն այսօր ամեն ինչ տեսել են, լսել են»;

«Ես՝ Սարիկ Միանսյանը, իմ նախընտրական շտաբը, որևէ առնչություն չունի, մեր կողմից որևէ բողոք չի գնացել որևէ կառույց։ Եթե որևէ անարդար բան լինի, ձեր կողքին անարդարության համար պայքարող անձ եմ»։
Աղբյուրը` Panorama.am