Արձանագրվեց Սերժ Սարգսյանի և Արմեն Սարգսյանի առաջին տարբերությունը

Սերժ Սարգսյանի ու Արմեն Սարգսյանի հանդիպման ժամանակ, երբ կողմերը հրապարակավ քննարկեցին ապագա ՀՀ նախագահի հարցը, երկուսն էլ հանդես եկան ելույթներով, որտեղ երևաց նրանց մտածողության տարբերությունները:

Օրինակ, Սերժ Սարգսյանը իր ելույթում նշեց հետևյալը.

Իհարկե, շատ ցանկալի է, որ Հայաստանի Հանրապետության չորրորդ նախագահն ընտրվի խորհրդարանական լայն համաձայնության պայմաններում: Եվ հաշվի առնելով մեր այս ցանկությունը՝ կարծում եմ, որ Ձեր մտորումների ժամանակ ճիշտ կլինի, որպեսզի հանդիպեք մեր կոալիցիոն գործընկերոջը՝ Դաշնակցությանը, խորհրդարանում ներկայացված քաղաքական ուժերին՝ «Ծառուկյան» և «Ելք» խմբակցություններին և տեսանելի ապագայում որոշում կայացնեք, որովհետև այդ ընտրությունները պետք է տեղի ունենան մարտի սկզբին: Եվ մեր ցանկությունն է, որ այդ ընտրությունները տեղի ունենան մեկ փուլով, և մարտի սկզբին մենք արդեն ունենանք Հայաստանի Հանրապետության չորրորդ նախագահ:

Ի պատասխան գործող նախագահի, Արմեն Սարգսյանն ընդգծել է , հետևյալը.

Շատ կարևոր է, որ որոշում ընդունելուց առաջ ես նույնպես առիթ ունենամ հանդիպել քաղաքական տարբեր ուժերին և՛ Ազգային ժողովում, և՛ Ազգային ժողովից դուրս՝ կուսակցություններին: Շատ կուզենայի հանդիպել նաև հանրության լայն շրջանակները ներկայացնող գիտական, մտավորական, հասարակական, բարեգործական կազմակերպություններին, գործարար շրջանակներին, աշխատավորական շրջանակներին: Իհարկե, անպայման կուզեի հանդիպել Արցախի Հանրապետության ղեկավարությանը և իհարկե, հանդիպել սփյուռքահայությունը ներկայացնող կառույցներին, կազմակերպություններին կամ անհատներին և դրանից հետո իմ որոշումը կայացնել:

Փաստորեն հենց սկզբից Արմեն Սարգսյանը ակնարկում է , որ ուզում է ավելի լայն լեգիտիմություն ձեռք բերել, այդ թվում ԱԺ-ից դուրս գտնվող տարբեր շրջանակների մոտ: Այստեղ է , որ ցցուն երևում է այս երկու մարդկանց մտածողության տարբերությունը: Սերժ Սարգսյանը չոր հաշվապահի նման հաշվել է, որ կարևոր է ԱԺ- ի ձայների քանակը, և ուրեմն կարևոր են ԱԺ-ի 4 խմբակցությունների հետ հանդիպումները: Արմեն Սարգսյանը շատ լավ հասկանում է ներկայիս ԱԺ-ի լեգիտիմության աստիճանը հասարակության մեջ, և դրա համար էլ կարևորում է նաև արտախորհրդարանական ուժերին, գործարար շրջանակներին, Ղարաբաղի ղեկավարությանը և Սփյուռքի ներկայացուցիչներին, ինչը խոսում է այս երկու մարդկանց մտահորիզոնների էական տարբերության մասին:

Հուսանք` այս մտահորիզոնների տարբերությունը հետագայում կապիտալիզացվի և հանգեցնի ավելի լուրջ ու սպասվելիք քաղաքական փոփոխությունների:

Հակոբ Կարապետյան