Ասադի կողմնակիցները մի շարք հարձակումներ են իրականացրել Սիրիայի նոր անվտանգության ուժերի վրա, կան զոհեր

Սիրիայի նախկին նախագահ Բաշար ալ-Ասադի կողմնակիցները Լաթաքիա նահանգի Ջաբլե շրջանում մի շարք հարձակումներ են իրականացրել նոր կառավարության անվտանգության աշխատակիցների դեմ։ Այդ մասին գրում է սիրիական Al-Watan թերթը։

«Զինված ուժերը օգնություն կտրամադրեն անվտանգության ուժերին, որոնք տարբեր վայրերում իրենց վրա կրել են Ասադի կողմնակիցների զինված խմբավորումների կազմակերպած միաժամանակյա հարձակումները»,-«ՌԻԱ նովոստի»-ի փոխանցմամբ գրում է հրատարակությունը։

Պարբերականի տվյալներով՝ բանակը լրացուցիչ ուժեր է ուղարկել Ջաբլա շրջան՝ կարգուկանոն հաստատելու և հարձակվողներին հակազդելու համար։ Հարձակումների հետևանքով, ըստ վերջին տեղեկությունների, սպանվել է անվտանգության 16 աշխատակից։ Լաթաքիայում պարետային ժամ է հայտարարվել մինչև ուրբաթ առավոտ։

Պարետային ժամ է սահմանվել նաև Լաթաքիայի հարևան Տարտուս քաղաքում։ Որոշումն ընդունվել է խաղաղ բնակչության անվտանգությունն ապահովելու նպատակով։ Հինգշաբթի օրը այնտեղ զանգվածային ցույցեր են տեղի ունեցել, որոնց մասնակիցները կարգախոսներ են վանկարկել ընդդեմ Սիրիայի նոր իշխանությունների։

Զինված ինքնապաշտպանական ստորաբաժանումների և Սիրիայի նոր կառավարության անվտանգության ուժերի միջև բախումներ են տեղի ունեցել նաև երկրի հարավում՝ Դարաա նահանգում։ Հարևան Սուվեյդա նահանգում, որտեղ հիմնականում դրուզ բնակչություն է ապրում, ակտիվիստները դուրս են եկել փողոց՝ կոչ անելով փոխել իշխանությունը: