Իսկ որն՞է լինելու նոր վարչապետի հատկանիշները

Նոր նախագահի հատկանիշների մասին Սերժ Սարգսյանը տվեց սպառիչ ձևակերպումներ։ Մնում էր ավելացնել նաև, որ նա պետք է ապրած չլինի Հայաստանում, երբեք կարծիք հայտնած չլինի հայաստանյան խնդիրների մասին՝ Ղարաբաղ, տնտեսություն, արտագաղթ և ըսդ այդմ ունենա տեսական պատկերացումներ Հայաստանի մասին։

Ապրիլին, ի դեպ, Ս. Սարգսյանը նման պատկերացումներով մեկին նշանակել է ԱԺ նախագահ՝ պետության երկրորդ դեմք։ Լավ մանկաբույժ է, բայց երբեք քաղաքական միտք չի ասել, ինքուրուն երբեք կարծիք չի հայտնել երկրում ծավալվող իրադարձությունների մասին, չունի սեփական պատկերացումներ Ղարաբաղի, հայ-թուրքական հարաբերությունների, շրջափակման, տնտեսության
զարգացման և այլնի մասին։

Դրանից ավելի վաղ Ս. Սարգսյանը վարչապետ է նշանակել մեկին, ով լավ մենեջեր է , բայց երբեք որևէ քաղաքական կամ հանրային բանաձևերով չի խոսել, երբեք չի ներկայացրել
հանրությանը պետության զարգացման իր տեսլականը։ Սա է չոր իրականությունը, բայց սա հետևանքն է կենցաղային վերնախավի և երկար տարիների ամորֆ ընդդիմության։

Հիմա հերթը հասնում է նոր վարչապետին։ Ակնհայտ է, որ Սերժ Սարգսյանը ապրիլին նշանակվելու է ՀՀ վարչապետ։ Քանի որ Հայաստանը այլևս մեկ մարդու կառավարմամբ պետություն է դառնում, սա շատ ավելի կարևոր է, քան մնացած բոլոր ապաքաղաքական պաշտոնները միասին։

Ինչ հատկանիշներով պետք է օժտված լինի վարչապետ Ս. Սարգսյանը։ Սա իսկապես շատ կարևոր է, որովհետև տեսականորեն իր մեջ ունի փոփոխությունների հնարավորություն։ Գործող նախագահն առայժմ շրջանցում է այս թեման, և բացը լրացնում են հյուսիսկորեական ժանրով խնդրանքները։ Ծագում է շատ կոնկրետ հարց՝ ում՞ վարչապետն է լինելու Սերժ Սարգսյանը. ԳալուստՍահակյանի՞, Շարմազանովի՞, Ճոյտի՞ , այս դասի այլ ներկայացուցիչների, թե՞ ավելի լայն հանրության։ Այսինքն գալու է պահը, որ գոնե ինքն իր մեջ Սերժ Սարգսյանը պետք է պատասխանի հարցին՝ ինչպիսի հատկանիշներով պետք է օժտված լինի ՀՀ վարչապետը։ Ուրիշ հարցնող չի լինելու։

Քաղաքական դաշտը այլևս ի վիճակի չէ նման հարցեր առաջադրելու։ Եվ այս համատարած «կոնֆորտ» զոնայում Ս. Սարգսյանը մնալու է մեն-մենակ. Ինքը և Հայաստանի բոլոր խնդիրները։ Այլևս նույնիսկ մարդ չի լինելու, որի հետ հնարավոր կլիներ կիսել պատախանատվությունը՝ ընթացիկ կյանքում և պատմության առաջ։ Բայց սա բացառապես Ս. Սարգսյանի ընտրությունն էր՝ ունենալ ապաքաղաքական դեմքեր իր իշխանության մեջ և ապաքաղաքական դեմքեր ընդդիմության մեջ։

Չի բացառվում, որ ապրիլին Ս. Սարգսյանը կատարելու է իր ամենակարևոր ընտրությունը. Ո՞ր հատկանիշներով և ո՞ր տեսլականով Սերժ Սարգսյանին նշանակել վարչապետ։

Կարեն Հարությունյան