Իշխանությունները սարսափած են բոյկոտից, ավելի կոշտ գործիքակազմն իրենց դեմ է աշխատելու․ Մանուկ Սուքիասյան

Իշխանությունները շատ լուրջ սարսափած են բոյկոտից և իրենց ռեսուրսներն ամբողջությամբ մարտի են նետել։ Այս մասին Factor TV-ին տված հարցազրույցում  հայտարարեց Երևանի ավագանու «Մայր Հայաստան» խմբակցության ղեկավար Մանուկ Սուքիասյանը։
Երևանի քաղաքապետ Տիգրան Ավինյանն այսօրվա գործակարգավարական խորհրդակցության ժամանակ հայտարարեց, որ հասարակական տրանսպորտում չվճարողների թիվը մեծ չէ։ Մանուկ Սուքիասյանը հերքեց քաղաքապետի այս պնդումը։ «Իրենք առավոտյան և երեկոյան ժամերին, երբ մարդիկ նորմալ չեն էլ տեղավորվում տրանսպորտի մեջ, թող շրջեն և տեսնեն, թե քանի տոկոս է կազմում բոյկոտող քաղաքացիների թիվը։ Իրենք պարտավոր են այդ ամենն արտահայտել թվերի տեսքով, իսկ իրենց արտահայտած թվաբանությունը խոսում է այն մասին, որ իրականում բոյկոտը մեծ ծավալներ ունի, հակառակ դեպքում՝ առավոտից երեկո, իրենց բանուգործը թողած, չէին զբաղվի բոյկոտը հերքելով։ Մենք կանգ առնելու մտադրություն չունենք»,- ընդգծեց ավագանիում երրորդ ամենամեծ ուժի ղեկավարը։
Տիգրան Ավինյանն այսօր նաև պնդեց, որ ուղեվարձը չվճարողները լուրջ վնաս են հասցնում քաղաքի բյուջեին՝ անգամ հարցականի տակ դնելով այս տարի նախատեսված 45 տրոլեյբուսների գնումը։ Քաղաքապետն առաջարկեց անցնել կոնկրետ համապատասխան միջոցներ կիրառելուն։
Մանուկ Սուքիասյանի գնահատմամբ՝ այս ամենը խոսում է այն մասին, որ բոյկոտը կայացել է։ «Տեսնելով, որ իրենց համար արդյունքները գոհացուցիչ չեն և բոյկոտը շարունակվում է, մտածում են այլ գործիքակազմ կիրառելու մասին, և պիտի ասեմ, որ դա աշխատելու է իրենց դեմ։ Իրենք որքան կոշտ գործիքակազմ կիրառեն, այնքան ավելի ռադիկալ է դառնալու բոյկոտի տրամադրված մարդկանց վարքագիծը»,- ասաց Սուքիասյանը։ 
Անդրադառնալով Ռոբերտ Քոչարյանի կառավարման տարիներին տրանսպորտային ռեֆորմ չիրականացնելու մասին հարցին՝ Սուքիասյանն ընդգծեց, որ այդ տարիներին երկիրն այլ մարտահրավերների առաջ էր կանգնած։ Հարցազրույցն ամբողջությամբ՝ տեսանյութում։