Հայաստանի չափազանց զգացմունքային բացասական արձագանքը տարակուսանք է առաջացնում. Զախարովա

ՌԴ-ի, ՀՀ-ի և Ադրբեջանի փոխվարչապետների եռակողմ աշխատանքային հանձնաժողովում երբեք խոսք չի եղել Հայաստանում որևէ արտատարածքային միջանցքի ստեղծման մասին. ճեպազրույցին ասել է ՌԴ ԱԳՆ պաշտոնական ներկայացուցիչ Մարիա Զախարովան:

«Ընդհակառակը, պայմանավորվածություն է ձեռք բերվել, որ երկրներն իրավասություն և ինքնիշխանություն ունեն իրենց տարածքով անցնող երթուղիների նկատմամբ»,- ասել է նա:

Զախարովայի խոսքով՝ եռակողմ աշխատանքային խմբին հաջողվել էր մոտենալ ապաշրջափակման խնդիրների լուծմանը, սակայն «Հայաստանը, Արևմուտքի ապակառուցողական ազդեցության պատճառով, խմբում աշխատանքը դադարեցրել է»: «Վստահ ենք, որ խմբի շրջանակում լիարժեք փոխգործակցության շուտափույթ վերսկսումը ոչ միայն կնպաստի Հարավային Կովկասի տարածաշրջանում տրանսպորտային և կապի համակարգի վերականգնմանը, այլև կապահովի ամբողջ տարածաշրջանի հետագա սոցիալ-տնտեսական զարգացումը», - ասել է ՌԴ ԱԳՆ պաշտոնական ներկայացուցիչը։ Անդրադառնալով ՀՀ ԱԳՆ-ի կողմից Սերգեյ Կոպրկինին փոխանցված բողոքի հայտագրին՝ Զախարովան նշել է.

«Հայաստանի չափազանց զգացմունքային բացասական արձագանքը ռուսական հեռուստաեթերում լրագրողի՝ այսպես կոչված «Զանգեզուրի միջանցքի» մասին հնչեցրած արտահայտություններին տարակուսանք է առաջացնում, քանի որ Մոսկվայի պաշտոնական դիրքորոշումը Երևանին քաջ հայտնի է։ Մենք միշտ Երևանից լսել ենք, որ Հայաստանը հավատարիմ է խոսքի ազատությանը, և առավել ևս Հայաստանի ներկայիս ղեկավարությունը դա դարձրել է իր հրամայականը:

Դա՝ մեկ, և երկրորդ՝ մեր պաշտոնական դիրքորոշումը՝ ոչ թե տեսակետը, այլ պետության պաշտոնական դիրքորոշումը, լավ հայտնի է Երևանին, դրա էությունը մենք բազմիցս հնչեցրել ենք»։