Քալիֆորնիայում անտառային հրդեհների զոհերի թիվը հասել է 24-ի

Առնվազն 24 մարդ է զոհվել Քալիֆորնիայի անտառային հրդեհների հետևանքով, հայտնում է ABC News-ը՝ հղում կատարելով Լոս Անջելեսի շրջանի բժշկական փորձաքննության գրասենյակի տվյալներին։

Ավելի վաղ հաղորդվել էր 16 զոհի մասին։ «Հաստատվել է, որ 16 մարդ է զոհվել Իտոնի, իսկ ութ մարդ՝ Պալիսադեսի հրդեհների հետևանքով»,- ասվում է զեկույցում:

Հունվարի 7-ին Լոս Անջելեսում բռնկված անտառային հրդեհները համարվում են նահանգի պատմության մեջ ամենախոշորը։ Իշխանությունների տվյալներով՝ հրդեհների ընդհանուր մակերեսը գերազանցել է 16 հազար հեկտարը։ Ավերվել է ավելի քան 12 300 շենք։ Օդերևութաբանները նշում են, որ հրդեհների արագ տարածման պատճառ է դարձել չոր ու քամոտ եղանակը։