Հայաստանը կանգնած է արտաքին և ներքին թշնամիների հարվածի վտանգի առջև. Ի՞նչ անել

Փաշինյանի կառավարության այս վերջին որոշումը՝  ԵՄ-ին անդամակցելու գործնթաց սկսելու վերաբերյալ, նոր ու էլ ավելի լուրջ սպառնալիքներ է առաջացրել  երկրի  համար:

Ռուսական շրջանակների կոշտ արձագանքը, թերևս անարձագանք մնաց Հայաստանի քաղաքական դաշտում: Այստեղ տիրում է կատարյալ փլուզված իրավիճակ, երբ մարդիկ չեն զգում, որ գոնե տեսականորեն պատասխանատվություն են կրում երկրի և այստեղ ապրող ժողովուրդի համար:

Եթե ոմանք մտածում են, թե պատասխանատվության խնդիրը վերաբերվում է բացառապես Փաշինյանին, ապա չարաչար սխալվում են:

Հենց այդ հանգամանքից էլ օգտվում է Փաշինյանը, ով չի վախենում նման որոշումներ կայացնելիս:

Իսկ  որոշ փորձագետներ քննարկում են, թե այսպես կոչված  «ռուամետ»  ուժերը ինչպես են դիմակայելու այս խնդրին:

Նշենք որ նման կերպ մտածողները, ովքեր իրենց փորձում են դիրքավորել, որպես «հավասարակշռվածներ», իրականում քիչ են տարբերվում Փաշինյանից և նրա թիմակիցներից:

Քանի որ, երբ վաղը Հայաստանի համար ներկրվող գազի գինը 165 դոլարից դառնա 500 դոլար, և հայաստանյան ողջ տնտեսությունը կանգ առնի, այդ նույն  «վերլուծաբանները»  կսկսեն խոսել Փաշինյանի սխալների մասին և նույնիսկ կհայտարարեն, որ Փաշինյանի քայլերը սխալ էին, և ինքն է միակ պատասխանատուն այդ իրավիճակի համար:

Իսկ երբ դրանից հետո ադրբեջանական բանակը ներխուժի Հայաստան, առաջ գան հազարավոր զոհեր, այդ նույն շրջանակները արդեն «կործանարար»  կգնահատեն Փաշինյանի քաղաքականությունը և այնպիսի դիրքորոշումներով հանդես կգան, որ ներկայիս «ռուսամետները»   նրանց համեմատ կդառնան «արևմտամետներ»:

Ինչո՞ւ է այդպես ստացվելու՝ նույնպես հասկանալի է:

Քանզի Հայաստանում այս 30 տարիների ընթացքում այդպես էլ չկարողացանք ձևավորել իրապես քաղաքագետների , քաղաքական գործիչների  դասակարգ, որը ոչ թե «օրվա կուրսով» կգնահատեր երևույթները, այլ կձևավորեր լուրջ դաս, որն էլ իր հերթին լուսավորչական աշխատանք կտաներ նաև լայն հանրության մեջ և, Հայաստանն էլ այս վիճակում չէր հայտնվի:

Այս պայմաններում, միակ լուծումը կոնկրետ միջավայր ձևավորելն է, որպեսզի այդ միջացայրում հնարավոր լինի ձևավորել այս իշխանությանը իրական այլընտրնանք:

Սակայն մեր դրսի «գործնկերները»  դա էլ են հաշվել և տարվա սկզբից որոշեցին քաղաքական դաշտում նոր ջրբաժաններ առաջացնել:

Այն,  որ այդ «դուրսը»  իրոք որ ունի լուրջ լծակներ՝ ազդելու համար Հայաստանի ողջ քաղաքական դաշտի վրա, ակնհայտ է:

Հայաստանից գողացված փողերը, որոնք գտնվում են արևմտյան օֆշորներում, այն հենքն են, որոնց միջոցով այդ նույն «դուրսը»  փորձում է ազդել նաև Հայաստանի քաղաքական կյանքի վրա՝ այդ գողացված փողերի տերերի միջոցով, թե իշխանամետ, և թե ընդիմադիր տիրույթներից:

Բայց այս մարտահրավերին էլ պիտի կարողանանք արժանապատվորեն դիմակայել, քանզի մենք այլ ելք չունենք:

 Նրանք   իրենց միլիարդավոր դոլարների փրկության հարցն են լուծում, իսկ մենք՝ մեր հայրենիքի փրկության խնդիրը:

Այս բազմաշերտ քաղաքական պատերազմում հաղթանակի համար անհրաժեշտ է համբերություն, չափի մեջ զսպվածություն և ճշգրիտ վերլուծված քայլեր:

Պարզ է մեկ բան.  Հայաստանի փրկության խնդիրը դժվարին է, բայց դրան այլընտրանք մենք չունենք: Մենք 100 տարի առաջ ստացել ենք ցեղասպանություն և կորցրել ենք մեր Հայրենիքի մեծ մասը:

Այսօր իրավունք չունենք կրկնելու նույն սխալները, քանզի այս անգամ կկորցնենք մեր Հայրենիքը ամբողդջությամբ:

Սա է իրականությունը:

Դավիթ Մկրտչյան
Zham.am