Տեսանյութում երևում է՝ դուք ոնց եք հարվածում ընկած Սերգեյ Ասատուրովին. Լևոն Քոչարյանը՝ ոստիկանին
Երևան քաղաքի ընդհանուր իրավասության դատարանի «Կենտրոն» նստավայրում դատավոր Կարեն Ֆարխոյանի նախագահությամբ ընթանում է ՀՀ ԱԺ «Հայաստան» խմբակցության պատգամավոր Լևոն Քոչարյանի և Սերգեյ Ասատուրովի գործով հերթական դատական նիստը։ Դատարանն այս փուլում լսում է գործով տուժող ճանաչված ոստիկանին՝ Հրաչիկ Խաչատրյանին։
Հիշեցնենք, որ Լևոն Քոչարյանին ու Սերգեյ Ասատուրովին մեղադրանք է առաջադրված ոստիկանության ծառայողների օրինական գործողությանը ենթադրաբար միջամտելու և, իբրև, բռնություն կիրառելու համար։
Պաշտպանական կողմը հարց ուղղեց Հրաչիկ Խաչատրյանին, թե սեպտեմբերի 23-ի միջադեպի ժամանակ, այսինքն՝ Քոչարյանին և Սերգեյ Խաչատուրովին բերման ենթարկելու օրը ոտքով հարվածե՞լ է Ասատուրովին, ինչին ի պատասխան ոստիկանը նշեց, որ չի հարվածել:
Լևոն Քոչարյանը դատարանին հայտնեց, որ իր մոտ առկա է տեսանյութ, որում Հրաչիկ Խաչատրյանը ոտքով հարվածում է ընկած Սերգեյ Ասատուրովին: Նա դատարանին խնդրեց թույլատրել ցույց տալ տեսանյութը, պաշտպաններն էլ հայտնեցին, որ տեսանյութը դիտելուց հետո դրա վերաբերյալ հարցեր են ուղղելու Խաչատրյանին:
Դատարանը որոշեց այս փուլում չթույլատրել տեսանյութի հրապարակումը՝ պատճառաբանելով, որ դատարանը զրկված չէ տեսանյութը հետագայում դիտելու, ինչպես նաև տուժող Հրաչիկ Խաչատրյանին կրկին հարցաքննելու հնարավորությունից:
Հետևեք մեզ Facebook-ում