Սահմանազատումից հետո Հայաստան-Ադրբեջան սահմանի որևէ հատվածում երրորդ ուժի ներկայության կարիք չի լինի. Փաշինյան

Մենք շարունակում ենք կառուցողական ներգրավված մնալ Ադրբեջանի հետ խաղաղության պայմանագրի քննարկումներում: Խաղաղության պայմանագրի չհամաձայնեցված երկու հոդվածների վերաբերյալ էլ արդեն մեկ ամսից ավելի առաջարկներ ենք փոխանցել Ադրբեջանին, որոնց վերաբերյալ դեռևս պատասխաններ չենք ստացել: Այս մասին Արմենպրեսի հետ հարցազրույցում ասել է Նիկոլ Փաշինյանը:

«Մենք առաջարկում ենք, որ երրորդ երկրների ուժերի չտեղակայման դրույթը տարածվի Հայաստան-Ադրբեջան սահմանի սահմանազատված հատվածների վրա, և սա տրամաբանական է, որովհետեւ այդ հատվածներում հենց սահմանազատման բերումով էսկալացիայի ռիսկն էականորեն նվազեցվում է, եթե չասենք նվազագույնի է հասնում: Ամբողջական սահմանազատումից հետո, հետևաբար, Հայաստան-Ադրբեջան սահմանի որևէ հատվածում երրորդ ուժի ներկայության կարիք չի լինի, և Հայաստանի Հանրապետությունն առաջարկում է այս տրամաբանությունը»,- ասել է նա:
--
Հիշեցնենք, որ Փաշինյանի կառավարման հետևանքով Արցախը հայաթափվել է, ամբողջությամբ հայտնվելով Ադրբեջանի ցեղասպանական ոճրագործ ռեժիմի վերահսկողության տակ, բացի դրանից՝ Փաշինյանի ու իր ՔՊ-ի կառավարման հետևանքով թշնամին ահռելի տարածքներ է զավթել անմիջականորեն ՀՀ-ից և շարունակում է հանդես գալ Հայաստանն ամբողջությամբ զավթելու դիրքերից: 
Ինչպես Արցախի հայաթափման, Արցախն ուրանալու, այնպես էլ՝ հազարավոր զինվորների մահվան մատնելու անմիջական քաղաքական պատասխանատվությունը Փաշինյանի ու նրա ՔՊ-ի վրա է: