«Ապագակա». Երևան–Բաքու չվերթ՝ «Զվարթնոց» օդանավակայանից, «վայելե՛ք»...

MediaHub–ն այսօր ահազանգ է ստացել, որ «Զվարթնոց» օդանավակայանում չվատախտակի վրա գրված է, որ ժամը 17.00-ին կիրականացվի չվերթ դեպի Բաքու։ Անգամ gate-ի համարն է նշված՝ Երևան-Բաքու չվերթ, gate 2-ից։ 

MediaHub–ին նաև լուսանկար են տրամադրել: 

Լրատվամիջոցը նախ ստուգել է «Զվարթնոց» օդանավակայանի կայքը, չվացուցակում որևէ թռիչք դեպի Բաքու նշված չի եղել, զանգահարել է նաև «Քաղաքացիական ավիացիա», որտեղից տեղեկացրել են, որ դեպի Բաքու ոչ մի քաղաքացիական չվերթ չկա նախատեսված։

MediaHub-ը կապ է հաստատել նաև «Զվարթնոց» օդանավակայանի մամուլի պատասխանատուի հետ, ով հաստատել է՝ նման չվերթ կա։ «Միջազգային կազմակերպության կողմից պատվիրված չարտերային չվերթ է»,- պարզաբանել է նա:

Հարցին՝ սա առաջի՞ն այդպիսի չարտերային չվերթն է դեպի Բաքու, թե՞ նախկինում էլ եղել են, ստացվել է հետևյալ պատասխանը.

«Այո, տարբեր միջազգային կազմակերպությունների կողմից պատվիրած չարտերային չվերթեր դեպի Բաքու և Բաքվից Երևան իրականացվել են»:
--
Իսկ թե ինչ «միջազգային կազմակերպություններ» են, այդ չվերթերով ովքեր են գնացել ու եկել, ի՞նչ են տարել ու բերել: Իսկ հնարավո՞ր է, որ նման չվերթերով Բաքվից նռնակներ են բերվել Երևան՝ փաշինյանական իշխանության դեմ ցույցերը ցրելու համար: Իսկ հնարավո՞ր է, որ նաև ադրբեջանական «կարմիր բերետավորներ» են բերվել...: Ոչինչ հայտնի չէ: 
Այսինքն, Հայաստանը զավթել ու հայությանը կոտորել սպառնացող թշնամական երկրի մայրաքաղաք գնալ-գալը «ջրի ճամփա» է դարձել: