2025 թվականի մայիսի 9-ին Մոսկվայում սպասում ենք ՀԱՊԿ անդամ պետությունների ղեկավարներին․ Պուտին

ՌԴ նախագահ Վլադիմիր Պուտինը Հավաքական անվտանգության պայմանագրի կազմակերպության (ՀԱՊԿ) երկրների ղեկավարներին և զինվորական անձնակազմին հրավիրել է 2025 թվականին Մոսկվայում անցկացվելիք Հայրենական մեծ պատերազմում հաղթանակի 80-ամյակի պատվին շքերթին, հայտնում է ТАСС-ը։

«Իհարկե, սպասում ենք ՀԱՊԿ անդամ երկրների ղեկավարներին Մոսկվայում 2025 թվականի մայիսի 9-ին։ Բացի դրանից, հրավիրում ենք ձեր երկրների ռազմական անձնակազմերին ռուս զինվորականների հետ միասին մասնակցել Կարմիր հրապարակում անցկացվելիք շքերթին»,-նշել է Պուտինը ՀԱՊԿ երկրների խորհրդարանների ղեկավարների հետ հանդիպմանը։

ՌԴ նախագահը նշել է պատմական ճշմարտության պահպանման համար ՀԱՊԿ երկրների աշխատանքի կարևորությունը։ Նա հիշեցրել է, որ նոյեմբերի վերջին Աստանայում անցկացված գագաթնաժողովում պայմանավորվածություն է ձեռք բերվել շարունակել համատեղ աշխատանքը՝ խթանելու «1945 թվականին տարած ընդհանուր հաղթանակի ընկալումն իբրև ընդհանուր արժեք համայն մարդկության համար»։