Ուշագրավ տեղեկատվական արտահոսքեր կան ադրբեջանական սոցմեդիայում․ Վարդան Բալյան

«Հայաստանն իր ատգործնախարարի և վարչապետի մակարդակով հայտարարում է, թե Խաղաղության պայմանագրի 17 կետերից 15-ը, այսինքն՝ 90 տոկոսը, համաձայնեցված են: Ի պատասխան՝ Ադրբեջանի արտաքին գործերի նախարար Ջեյհուն Բայրամովը ԵԱՀԿ արտաքին գործերի նախարարների 31-րդ նիստի ժամանակ իր ելույթում բաց տեքստով խաղաղության նախապայման է հայտարարում Ադրբեջանի նկատմամբ հողային պահանջատիրության վերացումը ՀՀ Սահմանադրության և օրենդրության փոփոխությունների միջոցով ու ԵԱՀԿ Մինսկի խմբի լուծարումը:

Ըստ որում, Ադրբեջանի նախապայմանները ամենևին չեն սահմանափակվում նշված երկու պահանջներով: Բաքվում արդեն երկու օր է ընթանում է Միջազգային կոնֆերանս՝ 51 երկրների 100-ից ավել ներկայացուցիչների մասնակցությամբ, թեման՝ «Վերադարձի իրավունք. Հայաստանի բռնագաղթված ադրբեջանցիների համար արդարության ապահովում»: Հետաքրքիր վերնագիր է, ինչ խոսք, հատկապես, եթե նկատի ունենանք, որ բանախոսները աներկբայորեն արձանագրում էին, որ մարդկանց բռնի տեղահանումը իրենց բնակության վայրից բոլոր պարագաներում անթույլատրելի է, իսկ վերադարձի իրավունքն ամրագրված է միջազգային իրավունքում:

Ադրբեջանից ու Արցախից հարյուր հազարավոր հայերի ջարդերի, պատերազմների միջոցով տեղահանած երկրի ներկայացուցիչներն, ըստ որում, մեղադրում են Հայաստանի Հանրապետությանը արևմտյան ադրբեջանցիների վերադարձի իրավունքի իրացմանը խոչընդոտելու համար:

«Հայաստանի կառավարությունը պարտավոր է ապահովել արևմտյան ադրբեջանցիների վերադարձը իրենց նախնիների հողեր ու վերադարձնել բռնագրավված և բռնազավթված ունեցվածքը կամ փոխհատուցել»: Հետաքրքրական տեղեկատվական արտահոսքեր կան ադրբեջանական սոցմեդիայում այս համատեքստում, ըստ որում, ալիևյան վարչակազմի հետ ուղղակիորեն փոխկապակցված աղբյուրներից: Ներկայացվում է, թե հայկական կողմը Ադրբեջանին առաջարկում է ստորագրել Խաղաղության պայամանագիր առանց նշված նախայմանների կատարման հանձնառության ձևակերպման՝ խոստանալով իրականացնել նշված պահանջները արտահերթ խորհրդարանական ընտրություններում հաղթանակից հետո: Հատկանշական են երկու հանգամանք՝ պնդումը, որ ընտրությունները լինելու են արտահերթ, դիտարկումը, թե առանց Խաղաղության պայմանագրի ստորագրման Փաշինյանը չի կարող հաղթել այդ արտահերթ ընտրություններում:

Մեկնաբանություններից հիմա ձեռնպահ կմնամ, քանի որ մեկնաբանելու իմաստ և կարիք, կարծում եմ, չկա»։