Իշխան Սաղաթելյանը Փարիզում հանդիպել է Ֆրանսիայի խորհրդարանի զույգ պալատների անդամների հետ

ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը, ով աշխատանքային այցով գտնվում է Փարիզում, հանդիպել է Ֆրանսիայի խորհրդարանի զույգ պալատների անդամների հետ։ ՀՅԴ-ից հայտնում են, որ մասնավորապես, Ֆրանսիայի Հանրապետության Ազգային ժողովում հանդիպում է տեղի ունեցել պաշտպանության հանձաժողովի փոխնախագահ, սոցիալիստ պատգամավոր Իզաբել Սանտիագոյի, իսկ Սենատում՝ Հայաստան-Ֆրանսիա խորհրդարանական բարեկամության խմբի անդամներ Մարի Առլեթ Կառլոտիի, Ջիլբերթ Լյուկ Դեվինազի, Հելեն Քոնվայ Մուրեթի, Օլիվիեր Ժաքուինի, Լուսիեն Սթանոզիի հետ։

Իշխան Սաղաթելյանը շնորհակալություն է հայտնել խորհրդարանականներին տևական ժամանակ ծավալած հայանպաստ գործունեություն համար։

Զրուցակիցները քննարկել են Հայաստանի Հանրապետության ներկա մարտահրավերները, արցախահայության իրավունքների պաշտպանության միջազգային աշխատանքների ընթացքը, տարածաշրջանային քաղաքական զարգացումները։ Իշխան Սաղաթելյանը ներկայացրել է ՀՅԴ մոտեցումները տարածաշրջանային անվտանգության, ՀՀ ներքաղաքական զարգացումների և արցախյան հիմնախնդրի ներկա փուլի վերաբերյալ։