Ազգային պատկերասրահը հոսանքազրկվել է միջազգային փառատոնի բացման ժամանակ

Նոյեմբերի 1-ը Երևանում կարելի է ասել՝ առանձնահատուկ էր Ավինյան-փաշինյանական քաղաքային իշխանության կողմից հանրային տրանսպորտի ուղեվարձի հետ կապված ձախողակ «նորամուծության» առումով: Թե ինչ խայտառակ պատկեր էր քաղաքային իշխանության անձեռնահասության հետևանքով, կարծում ենք, տեսան բոլորը, իսկ հանրային փոխադրամիջոցներով երթևեկող երևանցիներն զգացին նաև սեփական մաշկի վրա: Դասական, կարելի է ասել՝ քրեստոմատիկ նմուշ, թե ինչպես կարելի է ահռելի պրոբլեմ ստեղծել այնտեղ, որտեղ դա չկար: 
Բայց պարզվում է, խայտառակությունները միայն հանրային տրանսպորտով չեն ավարտվել: Առնվազն, Տիգրան Ավինյանի համար: Բանն այն է, որ Երևանում նոյեմբերի 1-ին փառատոնի բացում է եղել, որքան էլ զարմանալի թվա՝ ոչ գաստրոնոմիական: Կոնկրետ. նոյեմբերի 1-ին, Ազգային պատկերասրահում տեղի է ունեցել «Երևանի լուսանկարչական փառատոնի» բացումը: Դա միջազգային փառատոն է, որին նաև օտարերկրացիներ են մասնակցում, ներկա են եղել Հայաստանում հավատարմագրված դիվանագետներ: Ավելին, հրավիրված է եղել նաև Երևանի քաղաքապետի պաշտոնը զբաղեցնող Տիգրան Ավինյանը: Ու՝ հո՛պ, միջազգային փառատոնի բացման ժամանակ Ազգային պատկերասրահի շենքը հոսանքազրկվել է: Պատկերացնո՞ւմ եք, քաղաքապետի մասնակցության պայմաններում: Ու մոտ մեկ ժամ պատկերասրահում «լույս չի եղել»: Հասկանալի է, որ փառատոնի մասնակիցները, օտարերկրացի հյուրերն ու դիվանագետները ամենևին էլ հիացած չէին այդ պերֆորմանսով, թեպետ, կարծում ենք, հոսանքազրկումից ստացած տպավորությունները դեռ երկար ժամանակ չեն մոռանա: 
Հասկանալի է նաև, որ միջոցառման շատ մասնակիցներ, հեռախոսային լապտերիկներով լուսավորելով շրջակայքը, հեռացել են (նման պահ է պատկերված լուսանկարում): 
Այս հոսանքազրկումային խայտառակությունների վերջը կարծես չի երևում: Մեկ Օպերայի շենքն է հոսանքազրկվում պրեմիերայի ժամանակ, մեկ ֆուտբոլային միջազգային հանդիպման ժամանակ մարզադաշտ է հոսանքազրկվում, հիմա էլ, ահա՝ Ազգային պատկերասրահը: 
Հանկարծ կանգ չառնեք, խայտառակվեք մինչև վերջ: 
Zham.am