Ինչպես են ընթանում ընտրությունները Վրաստանի հայաշատ շրջաններում, մասնավորապես, Ջավախքում

Ինչպես հայտնի է, այսօր Վրաստանում անցկացվում են խորհրդարանական ընտրություններ, որտեղ պայքարն ընթանում է հիմնական 4-5 ուժերի միջև:

Գրեթե ոչ ոք չի կասկածում, որ իշխող «Վրացական երազանքը» կրկին հաղթանակ կտանի, սակայն ինտրիգն այն է, թե ինչ ցուցանիշներով այն  կարձանագրվի:

Մյուս ինտրիգն այն է, թե ինչպիսի հետընտրական գործընթացներ կնախաձեռնի ընդդիմությունը:

Ընտրական գործնթացում մինչ այս պահը մեծ միջադեպեր չեն գրանցվել, եթե չհաշվենք Մառնեուլի ընտրատարածքներից մեկում կատարվածը (տեղամասերից մեկում, ըստ լուրերի՝ «քվեաթերթիկներ լցոնելու» և բռնության դեպք է արձանագրվել, իրավապահներն այն արդեն հետաքննում են):

Ինչ վերաբերվում Ջավախքում ընտրության ընթացքին, ապա բոլորը նկատել են ժողովուրդի  մեծ  ակտիվությունը:

Առավոտից մարդիկ ակտիվորեն մասնակցում են ընտրական գործընթացին, և, ամենայն հավանականությամբ, այս տարածաշրջանում ընտրության մասնակիցների թիվը կլինի բավականին մեծ:

Մեր տեղական դիտորդների կարծիքով՝ մարդկանց վրա ազդել է նախընտրական արշավը և Ջավախքի ժողովուրդը չի ուզում վերադառնալ հին ժամանակներին, առավել ևս՝ չի ուզում, որ Վրաստանը վերածվի նոր «Ուկրաինայի»:

Այն որ Ջավախքում մարդկանց տրամադրվածությունը հենց այդպիսին էր մինչ ընտրությունները, բոլորին էր հայտնի: Սակայն այսօրվա պատկերը հուշում է, որ վրացահայերը ակտիվորեն են մասնակցում ընտրությանը, հասկանալով, որ այն ճակատագրական կարող է լինել Վրաստանի և, մասնավորապես, նաև այս երկրում ապրող հայերի համար:

Դավիթ Մկրտչյան
Zham.am