Որո՞նք էին Սերժ Սարգսյանի հարցազրույցի հիմնական մեսիջները

Նախ նշենք , որ հարցազրույցը նախկինի պես անոնսավորված չէր և կոնկրետ առիթի հետ նույնպես շաղկապված չէր, և դրանով իսկ ավելի հետաքրքիր էր. նախ և առաջ` թե ինչու գործող նախագահը որոշեց հենց այս պահին հարցազրույց տալ:

Հետաքրքիր է նաև այն, որ դա ասուլիս չէր, ոչ էլ` լրագրողների հետ կլոր սեղանի շուրջ հանդիպում: Սա էքսկլյուզիվ, այսինքն բացառիկ հարցազրույց էր` կոնկրետ հեռուստալրագրողի: Բայց այդ դեպքում էլ հարց է առաջանում, իսկ ինչ՞ու հարցազրույց տալ ոչ թե հանրային, այլ մասնավոր հեռուստաընկերությանը: Սրանք դետալներ են, որի հիմքում կարելի է թաքնված մեսիջներ տեսնել, հնարավոր է նաև ,որ այս դետալների շեշտադրումը չափազանցված է:

Ինչևիցե, փորձենք հասկանալ թե`

ինչ մեսիջներով հանդես եկավ Սերժ Սարգսյանը :

Ավանդաբար, լրագրողը հարցազրույցի կարևոր հարցադրումները թողեց վերջում:
Նշենք, որ երկրի հիմնական խնդիրների մասին խոսելիս գործող նախագահի գնահատականները զուսպ էին ու բալանսավորված: Նա աշխատում էր շատ փակագծեր չբացել, միևնույն ժամանակ չէր թաքցնում իր պատկերացումների հիմնական տրենդը:
Մասնավորապես, լրագրողի բավականին կոշտ հարցադրումներին` կապված կառավարության գործունեության գնահատականի վերաբերյալ, Սերժ Սարգսյանը միանշանակ պաշտպանեց ներկայիս գործող վարչապետին: Ավելին, երբ լրագրողը նշեց, որ Կարեն Կարապետյանը հայտարարել է, որ ուզում է 2018 թ. ապրիլից հետո կրկին զբաղեցնել վարչապետի պաշտոնը, Սերժ Սարգսյանը հանգիստ պատասխանեց, որ դա շատ լավ ցանկություն է, առողջ և տրամաբանված, ավելացնելով նաև , որ Կարեն Կարապետյանը թե որպես մարդ, և թե որպես վարչապետ իր և ՀՀԿ-ի համար ընդհունելի և օգտակար անձնավորություն է:

Սա հստակ մեսիջ էր իշխող վերնախավին, որ Կարեն Կարապետյանի դեմ խարդավանքները իր կողմից չի ողջունվելու և այն ապագա չի ունենալու:
Ինչ վերաբերվում է ապագա պաշտոնների նախագծի հնարավոր հրապարակմանը, գործող նախագահը նշեց, որ նախապես դրա մասին հայտարարելը կոնտր պրոդուկտիվ քայլ է, քանզի այդ որոշումով իրոք որ կպարալիզացվի ներկայիս ողջ կառավարման համակարգի գործնեությունը:

Իր ապագա անելիքների մասին նա գերադասեց չխոսել , հավանաբար ինքն էլ մինչև վերջ հստակություն չունի այս հարցի վերաբերյալ : Մեկ բան ակնհայտ է, որ այսօր Հայաստանին անհրաժեշտ է արմատական և լուրջ փոփոխություններ և գալուստսաակյանների մակարդակով երկիրը այլևս հնարավոր չէ կառավարել, ու գործող նախագահի խոսքից էլ պարզ դարձավ, որ ինքն էլ է դա հասկանում , քանզի դրա այլնտրանքը չկա, երկիրը կանգնած է երկնտրանքի առջև: Կամ Հայաստանը կգնա արմատական փոփոխությունների ճանապարհով, կամ էլ երկրին կսպասվի մեծ ցնցումներ ու տարատեսակ ներիշխանական դավադրություններ, կամ էլ` ավելի վատ, ահաբեկչական գործողությունների փորձեր, ինչից ոչ ոք չի շահի:

Հակոբ Կարապետյան