Պարզվում է՝ ՔՊ-ի «ուսապարկ» ու «համր» պատգամավորները նույնիսկ խոսել գիտեն

Երեկ ԱԺ-ում հանրությունը  ականատես եղավ, թե ինչպես էին խոսում նախկինում չխոսկան ՔՊ-ական պատգամավորները:

Դրանիցից մեկը անհայտ Լիլիթ Ստեփանյանն էր, ով երեք տարի չէր խոսել, բայց երեկ խոսեց, այն էլ ինչպես. «...շարժումը առաջնորդում է ինչ-որ հոգևորական, բայց շարժման մասնակիցների մեծ մասը հեթանոսներ են...»,- ասաց  ՔՊ-ական նախկինում համր ձևացած պատգամավորուհին:

Պարզվում է, նա այդ մտքին է հանգել,  երբ տեսել է, թե ինչպես են շարժման մասնակիցները Աստղիկ և Անահիտ անունները շատ  օգտագործում:

Իսկապես, ամո՛թ շարժման մասնակիցներին, ովքեր վիրավորել են Լիլիթ Ստեփանյանի զգացմունքները, ով ցանկացել էր տեսնել շարժման մեջ քրիստոնեական անուններ, սակայն նկատել է, որ մեծամասնությունը մնացել է հեթանոս:

Տիկին Ստեփանյանը նաև վիրավորված է շարժման այն անդամներից, ովքեր իշխանությանը պիտակավորում  են «դավաճան», «թուրք»,  «այլանդակ» ձևակերպումներով: Տիկին Ստեփանյանը այստեղ էլ է նեղված, քանի որ գիտի, որ «...իշխանությունն օր ու գիշեր միայն ժողովուրդի շահերով է տոգորված...»:

Մենք փորձեցինք հասկանալ, թե այս «համր» պատգամավորուհին է՛լ երբ է խոսել, պարզվեց՝ խոսել է երեք տարի առաջ, նշելով, որ այս իշխանությունը խնամի-ծանոթ-բարեկամ ակտիվորեն աշխատեցնում է, քանի որ իրենք էլ են ՀՀ քաղաքացի, և... ի՜նչ վատ բան կա դրա մեջ:   «Օրինակ իմ շատ բարեկամներ 2018-ից հետո նույնպես տարբեր պաշտոններ են զբաղեցնում, դրա մեջ ի՞նչ վատ բան կա»,- զարմացած ասում էր տիկինը՝ լրագրողի այն հարցին, թե ինչպես է նա վերաբերվում այն փաստին, որ Սասուն Միքաելյանի դուստրը տարբեր պետական պաշտոններ է զբաղեցնում:

Լիլիթ Ստեփանյանը հավանաբար չէր լսել Փաշինյանի այն ճառերը 2018-ին, որտեղ նա մեղադրում էր նախկիններին ԽԾԲ-ները պետական համակարգում լայնորեն օգտագործելու մեջ:

Լիլիթ Ստեփանյանը Փաշինյանի այն «ռեզերվից է», ով պատրաստ է ցանկացած բան արդարացնել:

Հավանաբար այսօր եկել է այդ պահը, որ բոլոր «համր»  ՔՊ-ական պատգամավորները պիտի խոսեն, որպեսզի շեֆը չմտածի, որ իրեն կարող են քցել: Հենց դրա համար էլ երեկ  խոսեց տիկին պատգամավորուհին, նույնիսկ հիշելով, որ շարժման ներկայացուցիչները շատ են  օգտագործում հեթանոսական Աստղիկ և Անահիտ անունները:

Ա՛յ, ա՛յ, ա՛յ, կասեր դասականը: Փաստորեն ի՜նչ ծանր վիճակում է հայտնվել Փաշինյանը, որ ստիպված սկսել է օգտագործել իր վերջին «ռեզերվը»:

Բայց արդյոք այդ «ռեզերվը» կփրկի շեֆին, ով նույնիսկ սկսել է կրկին հեծանիվ վարել, որ գոնե մի քանի տասնյակ մարդկանց մեջ կարողանա նկարվել, ցույց տալու համար, որ կա մի «ժողովուրդ», որ դեռ իրեն սիրում է:

Դրա համար Փաշինյանին պետք էր ոչ թե իր ԱԺ «ռեզերվն» օգտագործել, այլ տարբեր գյուղական շրջաններից և սարերի վրայից այնպիսի մարդկանց հավաքել, որ 2018-ից հետո ոչ հեռուստացույց էին դիտել, ոչ էլ լուրեր էին կարդացել:

Այդպիսի մարդիկ այսօրվա Փաշինյանին ավելի շատ օգուտ կտային, քան այսպիսի «ռեզերվայինները», որոնց իրական դեմքից արհեստական և կեղծ մտքեր են հնչում:

Սա է իրականությունը:

Դավիթ Մկրտչյան
Zham.am