Թանկացում հնարավոր է, բայց հստակ չէ. հացի գործարանի տնօրենը և սպառողների հարցերով ՀԿ նախագահը` հունվարի 1-ից հացի թանկացման մասին

Ցանկացած փոփոխություն՝ թե՛ օրենսդրական, թե՛ տնտեսական, ինչ -որ մտավախություններ առաջացնում է` կապված գների փոփոխության հետ. Tert.am-ի հետ զրույցում, անդրադառնալով հունվարի 1-ից հացամթերքի հնարավոր թանկացման վերաբերյալ հացարտադրողների շրջանում տարածված խոսակցություններին, այս մասին ասաց «Սպառողների խորհրդատվության կենտրոն» ՀԿ նախագահ Կարեն Չիլինգարյանը:

«Հաց գնի թանկացումը շատ հնարավոր է, բայց 100 տոկոսով ասել, որ այդպես կլինի, դժվար է, որովհետև հիմնականում ապրանքի թանկացում տեղի է ունենում հումքի թանկացման պարագայում, իսկ այս պարագայում թանկացումներ չեն եղել, նույն ցորենի ալյուրի թանկացում չի եղել»,-ասաց Չիլինգարյանը` միաժամանակ խոսելով նաև սանիտարական անձնագրեր ունենալու, ինչպես նաև հացը կահավորված մեքենաներով տեղափոխելու պահանջներով պայմանավորված հնարավոր լրացուցիչ ֆինանսական ծախսերի մասին։

Ըստ Չիլինգարյանի` սանիտարական անձնագրեր ներկայացնելու պահանջը դժվար թե մեծ ազդեցություն ունենա` հատկապես խոշոր արտադրողների վրա, ովքեր էլ հացի շուկայում գին թելադրողներն են: Իսկ հացը հատուկ կահավորված մեքենաներով փոխադրելու պահանջը, ըստ Չիլինգարյանի, ճիշտ է այն իմաստով, որ հացարտադրության ոլորտում անբարեխիղճ տնտեսվարողներին կարող է որոշակիորեն զսպել:

«Տեսած կլինեք` ինչ պայմաններում են հաց տեղափոխում։ Ինքս եմ նկարել և ֆիքսել սովորական մեքենայի թափքի մեջ, մարդկանց նստատեղերի վրա են հացը դնում կամ, ասենք, բեռնախցիկում, դա անընդունելի է, հակահիգիենիկ է: Պահանջը վաղուց պետք է լիներ: Արդյոք ստուգվո՞ւմ է, թե ինչ պայմաններում է այդ հացը թխվում, ազատականացված է շուկան և անբարեխիղճ տնտեսվարողներ կան, որ կիսանկուղային պայմաններում հակասանիտարական պայմաններում արտադրություն են իրականացնում»,- ասաց Չիլինգարյանը:

Նրա խոսքով` ինչպես հացարտադրության, այնպես էլ շատ այլ ոլորտներ անվերահսկելի են և իրապես պետական միջամտության անհրաժեշտություն կա:

Շարունակությունը կարդացեք` Tert.am կայքում