Անձրևի ու անտերության հետևանքները․ 26 երթուղին սպասարկող ավտոբուսն ուղևորներով մնացել էր ջրի մեջ
Ճգնաժամային կառավարման ազգային կենտրոն երեկ ահազանգ է ստացվել, որ Երևանի Գյուրջյան փողոցում ավտոբուսն արգելափակվել է ջրի մեջ․ անհրաժեշտ է փրկարարների օգնությունը:
ՆԳՆ փրկարար ծառայությունից հայտնում են, որ դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը:
Պարզվել է, որ թիվ 26 երթուղին սպասարկող ավտոբուսը և 4 մարդատար ավտոմեքենա արգելափակվել են անձրևաջրերի մեջ:
Փրկարարներն ավտոբուսից և ավտոմեքենաներից դուրս են բերել 8 քաղաքացու և արգելափակումից դուրս բերել՝ 2 ավտոմեքենա։
--
Մեր կողմից. կեցցեն, իհարկե, փրկարարները: Բայց արդար կլինի, որ հաջորդ անձրևից հետո, անխուսափելիորեն ծագող նման մեկ այլ գործողության փրկարարները իրենց հետ տանեն նաև Տիգրան Ավինյանին, Երևանի ավագանու քպ-ական խմբակցության անդամներին, ջրահեռացման աշխատանքների համար պատասխանատուներին, որպեսզի անձրևալճերից դուրս բերվող մարդիկ, ավտոմեքենաների վարորդները սրտա՛նց «շնորհակալություն» հայտնեն նրանց:
Հետևեք մեզ Facebook-ում