Հայ Առաքելական եկեղեցին զանգերն է հնչեցնում. վտանգի մեջ է ՀԱՅՐԵՆԻՔԸ․ Մետաքսե Հակոբյան

Արցախի Հանրապետության Ազգային Ժողովի «Արդարություն» խմբակցության պատգամավոր Մետաքսե Հակոբյանը հիշեցրել է՝ Հայ Առաքելական Եկեղեցու Արցախի թեմը կոչ է անում միանալ «Տավուշը հանուն Հայաստանի» շարժման կազմակերպած խաղաղության և համերաշխության երթին, որպեսզի Մայր Հայաստանը Արցախի ճակատագրին չարժանանա։ Այս առնչությամբ Մետաքսե Հակոբյանը հայտարարել է՝ գնում է եկեղեցու կանչով․

«Հայ Առաքելական եկեղեցին զանգերն է հնչեցնում. վտանգի մեջ է ՀԱՅՐԵՆԻՔԸ։ Ես զավակն եմ ՀԱՅՐԵՆԻՔԻ և ԵԿԵՂԵՑՈւ ու պարտավոր եմ և գնում եմ եկեղեցու կանչով… ԱՐՑԱԽԻ ԹԵՄԱԿԱԼ ԱՌԱՋՆՈՐԴ ՎՐԹԱՆԵՍ ՍՐԲԱԶԱՆ. «Սիրելի արցախցիներ, Հազարամյա մեր բնօրրանի բռնազավթումի և կորուստի վերքը դեռ չսպիացած՝ շարունակվում է միակողմանի զիջումների վտանգավոր գործընթացը, որը գոյաբանական լուրջ մարտահրավերների առջև է կանգնեցրել Հայաստանի պետականությունը: Հայրենիքն է մեր ժողովրդի յուրաքանչյուր զավակի արժանապատիվ գոյության երաշխիքը, ուստի պետք է իմաստություն և ուժ գտնենք մեր մեջ՝ հետ շրջելու վայրընթաց գնացող այս անիվը, որպեսզի Մայր Հայրենիքը չունենա Արցախի դառը փորձառությունը: Սիրելիներ, հորդորում ենք բոլորիդ միանալ «Տավուշը հանուն Հայաստանի» շարժման կազմակերպած խաղաղության և համերաշխության երթին: Հզոր Հայաստանը ցանկությունն է մեր քաջարի նահատակների և հիմքը մեր ապագա բոլոր իղձերի կատարման»։.