Սահմանազատման քարտեզները փոխանցել են ՊՆ-ին և բարձրացրել գաղտնիության աստիճանը. Տիգրան Աբրահամյան (տեսանյութ)

Այս իրականության մեջ իշխանությունները իրականում բավարարում են Ադրբեջանի միակողմանի պահանջները և առաջ են տանում ադրբեջանական օրակարգը: Այս մասին ԱԺ ճեպազրույցների ժամանակ ասաց «Պատիվ ունեմ» խմբակցության քարտուղար Տիգրան Աբրահամյանը։
«Հստակ չէ, թե հիմքը ո՞ր քարտեզն է և արդյոք  1984-88 թվականների դեմարկացիան և դելիմիտացիան է հիմնականը: Դիմել եմ Կադաստրի կոմիտե, որ ծանոթանամ այդ քարտեզներին, բայց պարզվել է, որ այն փոխանցել են Պաշտպանության նախարարություն և դրանց գաղտնիության աստիճանը բարձրացրել են։ Իշխանությունները մարդկանց, այդ թվում պատգամավորներին զրկել են  այդ քարտեզներին ծանոթանալու հնարավորություններից, որով տեղի են ունենում այդ գործընթացները։ Փաստացի ՀՀ-ի այն քարտեզը, որով այդ գործընթացը տեղի է ունենում իշխանությունները գաղտնիության այն աստիճանն են տվել, որ դրանց ծանոթանալու հնարավորություն պարզապես չկա»,- ասաց նա։

Ընդդիմադիր պատգամավորը հայտնեց նաև, որ ՀՀԿ-ն ողջունում է Բագրատ Սրբազանի առաջնորդած շարժմանը, ինչպես սատարել է բոլոր այն շարժումները, որտեղ եղել են գիտակցված մոտեցումներ և ախտորոշում, որ այս իշխանությունները երկիրը տանում են տապալման ճանապարհով։

«Այս 6 տարիների ընթացքում մենք եղել ենք պայքարի բոլոր խրամատներում և չենք կարող  անտարբեր լինել Հայաստանում տեղի ունեցող մնացած գործընթացներից»,-ասաց Աբրահամյանը:
Աղբյուր՝ Yerevan.today