Անչափահասների են Կիրանց գյուղից հրավիրել ոստիկանության բաժին․ Բագրատ Սրբազան

Անչափահասների են Կիրանց գյուղից հրավիրել ոստիկանության բաժին, երեւի ինչ-որ ձեւով քննելու կամ փորձելու ինչ-որ բաներ կորզել երեխաներից, թե ովքեր են մեղավորները այն գիշերվա տեղի ունեցածի համար: Այս մասին, երեկ Կիրանցում լրագրողների հետ զրույցում նշեց Տավուշի թեմի առաջնորդ Բագրատ Սրբազանը:

«Փորձելու են մարդկանց հունից հանել կամ երեւի վախեցնել: Մենք էս գլխից ասում ենք՝ այդ անազվիվ ճանապարհներով մի գնացեք: Ընդհանրապես, իրավապահ համակարգը, ավելի լավ է քննեք, թե պատճառներն ինչ են, ոչ թե հետեւանքները փորձեք լուծել:

Օրինակ, Նոյեմբերյանի դեպքը ծագել է որպես սադրանք Երկրապահների ղեկավար Յուրայի եւ նրա հարակից տղաների կողմից, երբ մեքենայով հարվածել են երիտասարդներին: Եվ մինչեւ այդ ամենավերջին ստահակի պես հայհոյանքներ են հասցրել, վիրավորել են արժանապատվությունը այն երիտասարդների, որոնք դուրս են եկել հայրենիքը չզիջելու համար: Այդ հուզական վիճակում տղաների քայլը չարդարացնելով հանդերձ, ուզում եմ ասել, որ պատճառները պետք է քննել, ոչ թե հետեւանքները: Նույնը Կիրանցի դեպքում է, թե ինչու այդ աստիճանին հասավ, երբ մգեցված ապակիներով, առանց համարանիշների, անհայտ ինքնության մարդիկ գալիս են այստեղ եւ գրգռում են ուղղակիորեն, եւ ժողովուրդը ոտքի է կանգնում ընդվզելու»,-ասաց նա: