Հարցվածների ավելի քան 90 տոկոսը դեմ է Տավուշի գյուղերը հանձնելուն. «Գելլափ»

Տավուշի գյուղերը հանձնելուն դեմ է քաղաքացիների 90 տոկոսը։ Այս մասին ցույց են տալիս Գելլափ միջազգային հետազոտական կենտրոնի հայաստանյան գրասենյակի հարցումները։
Ըստ News.am-ի, «GALLUP International association»-ի հայաստանյան ներկայացուցչության տնօրեն Արամ Նավասարդյանը ներկայացրեց այդ թեմայի առնչությամբ հարցման արդյունքները․
«2,9 տոկոսը նշել է, որ միանշանակ ընդունելի է։ Ավելի շուտ ընդունելի է, կարծում է 6 տոկոսը, ավելի շուտ ընդունելի չէ, կարծում է 7,8 տոկոսը, 79,7 տոկոսը նշել է, որ ընդհանրապես ընդունելի չէ, 3,6 տոկոսը դժվարացել է պատասխանել։ Այսինքն՝ շուրջ 90 տոկոսը կարծում է, որ այս մոտեցումը ընդունելի չէ»։
Այստեղ մեր կողմից նկատենք, որ բավականին հետաքրքրական պատկեր է ձևավորվում, երբ համադրում ենք նույն հարցման այլ արդյունքների հետ: Ինչպես նշվել է, Փաշինյանի գործունեությունը դրական է գնահատել հարցվածների ընդամենը 8 տոկոսը, ավելի ճիշտ է ասել՝ «տոկոսիկը»: Դա մոտավորապես համընկնում է հայկական տարածքները թշնամուն նվիրելու իշխանական նկրտումներն «ընդունելի» և «ավելի շուտ ընդունելի» համարողների տոկոմասին ցուցանիշին: 
Բնականաբար, թշնամուն տարածքներ նվիրելու մարմաջով տոգորվածների թիվը բացահայտ փոքրամասնություն է, ինչպես հիմա Հայաստանում է հենց «փոքրամասնության իշխանություն»: Բայց մյուս կողմից, եթե Փաշինյանի գործունեությունը բացասական է գնահատել հարցվածների մոտ 75 տոկոսը, ապա Տավուշի գյուղերի կենսատարածքը, հայկական տարածքները թշնամուն հանձնելու իշխանական որոշմանը դեմ է արտահայտվել արդեն 90 տոկոսը: 
Այսինքն, մարդիկ, որոնք ինչ-որ տեղ կողմնորոշված չեն իշխանության նկատմամբ վերաբերմունքի հարցում կամ չեն արտահայտվում, արդեն այս հարցում հստակ դեմ են արտահայտվում: 
Առհասարակ, հարցումները ևս հուշում են, որ այսօր Փաշինյանի իշխանությունը չունի հանրային աջակցություն (թող 7-8 տոկոսը որևէ մեկին չմոլորեցնի), ինչը, կարծում ենք արդեն ակնհայտ է գրեթե բոլորին, նույնիսկ՝ հենց իշխանավորներին: Դրա մասին է վկայում նաև նրանց ագրեսիվ, անհավասարակշիռ, դյուրագրգիռ պահվածքը՝ լրագրողների կամ ընդդիմադիրների հետ թեկուզ դիպվածային հարցուպատասխանների ժամանակ: