Ժուռնալիստների միությունը դատապարտում է ոստիկանության գործողությունները
Հայաստանի Ժուռնալիստների միությունը դատապարտել է Նարեկ Սամսոնյանի նկատմամբ ոստիկանության գործողությունները: «Այսօր առավոտյան, իր բնակարանից դուրս գալուց հետո, ավտոկայանատեղիում ոստիկանության աշխատակիցները մի քանի հոգով թիկունքից հարձակվել ու անհամաչափ բիրտ ուժի կիրառմամբ գետնին են տապալել AntiFake.am կայքի հիմնադիր, «Քաղաքացիական գիտակցություն» հասարակական կազմակերպության հիմնադիր, «Իմնեմնիմի» փոդքաստի համահեղինակ ու վարող Նարեկ Սամսոնյանին:
Դեռևս չանդրադառնալով հարուցված քրեական վարույթին ու դրա մանրամասներին՝ Հայաստանի ժուռնալիստների միությունն անընդունելի է համարում կոնտենտի բովանդակության հանգամանքով պայմանավորված՝ որևէ անձի նկատմամբ գործադրված անմարդկային բռնությունը: Նարեկ Սամսոնյանին նման կերպ ձերբակալել կարող էին միայն, եթե վերջինս կոշտ դիմադրություն ցույց տար, զինված լիներ կամ ոստիկանների կյանքին վտանգ սպառնար, ինչը, դատելով հրապարակված տեսանյութից, չի եղել:
Նարեկ Սամսոնյանի ձերբակալումն ակնհայտորեն դուրս է քրեադատավարական օրենսդրության շրջանակներից: Հայաստանի ժուռնալիստների միությունը խստորեն դատապարտում է ոստիկանության աշխատակիցների վայրագ գործողությունները, Նարեկ Սամսոնյանի՝ որպես անձի ու լրատվամիջոցի հիմնադրի արժանապատվությունը կոպտորեն խախտելու սանձարձակ միտումը»,- ասված է հայտարարության մեջ:
Հետևեք մեզ Facebook-ում