Արսեն Հարությունյանը եզրափակիչ մենամարտում ոչ մի շանս չտվեց թուրք մրցակցին ու հաղթեց 10-0 հաշվով՝ չորրորդ անգամ նվաճելով Եվրոպայի չեմպիոնի կոչումը

Բուխարեստում շարունակվող ազատ ոճի ըմբշամարտի Եվրոպայի առաջնությունը յուրօրինակ ու փայլուն ելույթներով զարդարեց 57 կգ քաշային կարգում հանդես եկող Արսեն Հարությունյանը: 
Եվրոպայի եռակի չեմպիոնը երեկ, ինչպես արդեն հայտնել ենք, բացահայտ առավելություն դրսևորեց մրցակիցների նկատմամբ՝ հաղթելով նույն՝ 10-0 հաշվով, միաժամանակ, մրցամարտերն այդպիսով ավարտելով ժամկետից շուտ: Նշել էինք նաև, որ ադրբեջանցի մրցակցին հաղթելուց հետո, Արսենը եզրափակիչ մրցամարտում ուժերը պիտի չափեր Թուրքիան ներկայացնող մարզիկի հետ: 
Բայց առաջին ու վերջին 50 վայրկյանների ընթացքում պարզվեց, որ «ուժերը չափելը» այս մրցամարտի համար չէ, այնքան որ բացահայտ էր Արսեն Հարությունյանի առավելությունը: Մեր մարզիկը ոչ մի շանս չտվեց թուրք մրցակցին ու եզրափակիչ մարտն էլ ավարտվեց նույն՝ 10-0 հաշվով, իսկ Արսենն էլ չորրորդ անգամ նվաճեց Եվրոպայի չեմպիոնի կոչումը: 
Եվ այսպես՝ Արսեն Հարությունյանը դարձավ Եվրոպայի քառակի չեմպիոն, մրցագորգի եզրագծով չեմպոնական պատվո շրջան անելով, ծածանեց խաչով դրվագված Հայոց եռագույնը:
Ի դեպ, հատուկ պետք է ընդգծել Արսեն Հարությունյանի ասպետավայել վարքը՝ մրցակիցների նկատմամբ: Տեսանյութում կարող եք հետևել, թե ինչպես է հաղթական գոտեմարտից հետո հայ ըմբշամարտիկը մրցակցին օգնում ոտքի կանգնել, ապա յուրովի սփոփում է նրան: 
Տեսանյութը՝ հղումով
https://interfootball.am/%d5%a1%d6%80%d5%bd%d5%a5%d5%b6-%d5%b0%d5%a1%d6%80%d5%b8%d6%82%d5%a9%d5%b5%d5%b8%d6%82%d5%b6%d5%b5%d5%a1%d5%b6%d5%a8-%d5%bb%d5%a1%d5%ad%d5%bb%d5%a1%d5%ad%d5%a5%d6%81-%d5%a9%d5%b8%d6%82%d6%80%d6%84/