Ադրբեջանը հետաքրքրված է ռուսական արտադրության անօդաչու սարքերով

Ադրբեջանը հետաքրքրված է անօդաչու սարքերի ձեռքբերմամբ, որոնք արտադրվելու են ՌԴ Աստրախանի մարզում՝ «Լոտոս» հատուկ տնտեսական գոտու տարածքում:

Ինչպես տեղեկացնում է «Интерфакс.az»-ը, Աստրախանի նահանգապետ Ալեքսանդր Ժիլկինի գլխավորությամբ գործող «Լոտոս» գոտու դիտորդական խորհուրդը հավանության է արժանացրել «ИнПроект» ընկերության բիզնես-ծրագիրը:

«Նախագծի շրջանակում նախատեսվում է ծովային ինքնակառավարվող անօդաչու միջոցների կողմից ստացվող տեղեկատվության հավաքման և մշակման տեղեկատվա-վերլուծական կենտրոնի ստեղծում, ինչպես նաև ծովային բազմաթիրախային անօդաչու հարթակների սեփական արտադրության կազմակերպում»,- հայտնել է «Լոտոս»-ի գլխավոր տնօրեն Սերգեյ Միլուշկինը:

Նա հավելեց, որ «ИнПроект»-ը կարող է ստանալ գոտու ռեզիդենտի կարգավիճակ մինչև տարեվերջ:

Նախատեսվում է, որ սարքը գործի է դրվելու քամու ուժի հաշվին: Կիրառման ոլորտը լայն է՝ ձկնային պաշարների վերլուծություն, շրջակա միջավայրի համալիր մոնիթորինգ, օվկիանոսաբանություն և հիդրոգրաֆիա, ծովային նավթագազային հանքավայրերի ուսումնասիրում, որոնողափրկարարական աշխատանքներ: Նման սարքերի մրցակցային առավելությունը կայանում է բարձր աստիճանի ինքնավարության և ավելի քան 20 տեսակի խնդիրների լուծման հնարավորություն:

Zham.am