Սկանդալ Փաշինյանի կառավարությունում, ընկել են երդվյալ յուրայինների ետևից, էկոնոմիկայի փոխնախարարի բերման ենթարկվելու լուրերը հաստատվում են

Ինչպես հաղորդում է «Առավոտ»-ը, Էկոնոմիկայի նախարար Վահան Քերոբյանին լրագրողները հարց ուղղեցին՝ իրավապահներն ինչո՞ւ են այսօր խուզարկություն սկսել էկոնոմիկայի նախարարությունում։ «Ես չգիտեմ՝ ինչու են մտել։ Քննչական մարմինները պետական կառավարման մարմիններ կարող են մտնել հիմնականում կոռուպցիոն գործերով։ Եվ մենք, բնականաբար, կարեւորում ենք կոռուպցիայի դեմ պայքարը։ Բայց միաժամանակ հարգում ենք մարդկանց անմեղության կանխավարկածը։ Ուրիշ հարց մի տվեք, ես տեղյակ չեմ»,- ասաց Քերոբյանը։
Հարցին, թե փոխնախարար Անի Իսպիրյանի պաշտոնից ազատումը կապ ունի՞ իրավապահների գործողությունների հետ, Քերոբյանը պատասխանեց․ «Իմ կարծիքով՝ դա պատահականություն է։ Անին ասել էր, որ ամուսինն աշխատանք է ստացել Հոլանդիայում, իրենք պատրաստվում են տեղափոխվել։ Եվ տեղափոխվելուց մի քանի օր առաջ դիմում է դրել»։ Հարցին, թե ԱԱԾ աշխատակիցնե՞րն են խուզարկություն իրականացնում, Քերոբյանը պատասխանեց, որ չգիտի․ «Ես հարգում եմ իրավապահ մարմինների աշխատանքը, իրենք իրենց գործն են արել։ Ես Ազգային ժողովում էի, դեռեւս ոչ մի նորություն չունեմ»։
Նշենք, որ ըստ «Հրապարակի»՝ էկոնոմիկայի նախարարությունում խուզարկում են երեկ աշխատանքից ազատված փոխնախարար Անի Իսպիրյանի աշխատասենյակը, առգրավել են նրա իրերը։
Իսկ Yerevan.today-ը քիչ առաջ հաղորդեց, որ էկոնոմիկայի նախարարի մամուլի խոսնակ Աստղիկ Սարգսյանը հաստատել է նախարարի տեղեկալ Անի Իսպիրյանի բերման ենթարկման մասին տեղեկությունը:
Նշենք, որ Իսպիրյանն այսօր ազատվել էր էկոնոմիկայի նախարարի տեղակալի պաշտոնից: Նրա հետ միասին բերման է ենթարկվել նաև Էկոնոմիկայի նախարարության հանրային ներդրումների վարչության պետը։
Ի դեպ, հավելենք, որ Անի Իսպիրյանը փաշինյանական իշխանության կազմում հայտնվել է «իգործ» ծրագրի շրջանակներում, 2020 թվականին: Այն ժամանակ Մոսկվայի Լոմոնոսովի անվան համալսարանի գերազանցիկ շրջանավարտ Անի Իսպիրյանը ՌԴ նախագահին առընթեր ազգային տնտեսության եւ պետական կառավարման ռուսական ակադեմիայի   արտաքին կապերի եւ արարողակարգի վարչության փորձագետ էր: Գալով Հայաստան, նշանակվել է էկոնոմիկայի նախարարության փորձագետ: Փաշինյանի կողմից կապիտուլյացիոն հայտարարություն ստորագրելուց հետո Անի Իսպիրյանը իշխանությունից չի հեռացել, իսկ 2021թ. սեպտեմբերին արդեն նշանակվել է էկոնոմիկայի նախարարի տեղակալ: Նախօրեին ազատվել է այդ պաշտոնից: 
Մենք ևս հարգում ենք անձի անմեղության կանխավարկածը, բայց դրանից անկախ, դժվար չէ նկատել, որ փաշինյանական վարչախումբն արդեն ընկել է երդվյալ յուրայինների ետևից: