Իշխանական անտարբերության ու համակողմանի անտերության շղթայական «ռեակցիան»

Հունվարի 12-ի գիշերը, ժամը 20-ի սահմաններից սկսած, մինչև հունվարի 13-ի գիշերվա ժամը 3-4-ի սահմանները, այսինքն՝ ավելի քան 6 ժամ լարված ու խայտառակ վիճակ է եղել Երևան-Իջևան մայրուղու 43-րդ կմ-ի վրա տեղի է ունեցել շղթայական վթար: Ինչպես հաղորդում է shamshyan.com-ը, մերկասառույցի ու ճանապարհածածկի խայտառակ վատ վիճակի պատճառով միմյանց են բախվել տարբեր մակնիշի շուրջ 40 ավտոմեքենա, այդ թվում՝ բեռնատար: Լրատվամիջոցները հաղորդում են, որ վթարների հետևանքով 8 քաղաքացի տեղափոխվել է հիվանդանոց: Զուտ երջանիկ պատահականույթամբ զոհեր չկան: Պաշտոնական աղբյուրները նշում են վթարված 17 մեքենայի մասին: Ըստ երևույթին, հաշվել են միայն ջարդուխուրդ եղածները: 
Բայց հարցն այլ է. այն, թե ի՞նչ է կատարվում Հայաստանի ավտոճանապարհներին: Դրանք Նիկոլ Փաշինյանի իշխանության քարոզչական «աչքահուլունքն» են, այսինքն՝ ինչ լինի-չլինի, եթերով ու ընդհանրապես, հանրության աչքն են խոթում, թե՝ տեսե՜ք, ինչ կա-չկա՝ ասֆաքլտել ենք, ճանապարհ ենք սարքել, անգամ Էրատտո թագուհու ժամանակներում էսպիսի ասֆալտ չի արվել և այդպես շարունակ: Ենթադրենք:
Բայց մե՞ջն ի՛նչ: Ճանապարհներին ասֆալտ փռելուց բացի, պետք է նաև զբաղվել ճանապարհների սպասարկմամբ: Բանակի ուժեղացնելու փոխարեն բացառապես ոստիկանական «լեգեոններ» կազմող ու դրանց անհարկի պարգևավճարող փաշինյանական իշխանությունը գործնականում չի զբաղվում գովազդաասֆալտած ճանապարհների սպասարկմամբ: Ու տեղի ունեցած շղթայական վթարը դրա մասին է վկայում առաջին հերթին: 
Այս տարին մի առանձնապես ձնառատ էլ չի: Բայց ընդամենը մի քանի ժամ ձյուն տեղաց և՝ ահավասիկ. տասնյակ ջարդված մեքենաներ, բազմաթիվ վիրավորներ: Գուցե մահաբեր-աղետաբերների իշխանության համար դա նորմալ է, բայց առհասարակ, դա խայտառակություն է ու խայտառակ վիճակ: 
Ո՞վ պիտի հետևեր ճանապարհածածկի վիճակին: Ո՞վ պիտի հետևեր, որ տվյալ ուղղության վրա մեքենաների շարժն առժամանակ սահմանափակվի: Կարճ ասած, նախքա՛ն վթարը ինչ բանի են եղել ճանապարհ սպասարկողները, ոստիկանները, պարեկները: Թե՞ սպասել են, որ մի բան լինի, որպեսզի հետո գան ու «հերոսաբար պայքարեն» հետևանքների դեմ: