Փաշինյանն ինքնուրույն սուբյեկտ չէ, նույնիսկ Արցախն Ադրբեջանին հանձնելով՝ նա չի կարող փակել Արցախի հարցը․ Արմեն Բադալյան (տեսանյութ)

Նիկոլ Փաշինյանը մեզ չի կարող ներքաշել որևէ կոնֆլիկտի մեջ, քանի որ նա ինքնուրույն սուբյեկտ չէ։ 2018-ին, երբ նրան բերին իշխանության, նա երեք խնդիր ուներ լուծելու։ Առաջինն Արցախի ամբողջական հայաթափումն էր, որը լուծվեց երկու փուլով։ Առաջին փուլը կապիտուլյացիոն ակտի ստորագրումն էր, բայց ռուս խաղաղապահները կարողացան ինչ-որ մաս փրկել։ Երկրորդ փուլը տեղի ունեցավ արդեն այս տարվա սեպտեմբերի 19-ին, երբ մի քանի օրում արցախցիները դուրս եկան այնտեղից, և նա Արցախը հանձնեց Ադրբեջանին։ Արցախի հանձնումն Ադրբեջանին, սակայն, Արցախի հարցի փակում չէ։ Այս պահին նա իր առջև դրված առաջադրանքներից մեկը կատարել է։ 168TV-ի «#ՕրաԽնդիր» հաղորդման ժամանակ նման կարծիք հայտնեց քաղտեխնոլոգ Արմեն Բադալյանը:
«Փաշինյանի առջև դրված երկրորդ խնդիրը Ռուսաստանի հետ ռազմաքաղաքական հարաբերությունների սառեցումն է։ Անցյալ տարվա աշնանից սկսած՝ Հայաստան-ՀԱՊԿ հարաբերությունները բավականաչափ սառն են, ՀԱՊԿ-ից հետ է կանչվել ՀՀ մշտական ներկայացուցիչը, նա այլ տեղում է դեսպան նշանակվել, իսկ ՀԱՊԿ-ում մենք մշտական ներկայացուցիչ չունենք։ Անցյալ աշնանից Հայաստանը ՀԱՊԿ-ի որևէ զորավարժության չի մասնակցել։ ՀՀ ԱԳ նախարարն օրերս ասաց, թե ԵԱՏՄ-ի հետ և ՀԱՊԿ-ի հետ հարաբերություններն այլ են։ Փաշինյանն էլ քանիցս նշել է, որ ՀԱՊԿ-ի հետ հարաբերություններում խնդիր կա։ Սա նրա առջև դրված երկրորդ առաջադրանքի կատարման փորձն է»,- ասաց քաղտեխնոլոգը:
«Երրորդ խնդիրը միջանցքի հարցն է։ Ադրբեջանն ուզում է իր հիմնական տարածքից Նախիջևանին միանալ միջանցքի և ոչ թե՝ պարզապես հաղորդակցության ուղիների միջոցով։ Սա կատեգորիկ թույլ չտվեց իրականացնել Իրանի Իսլամական Հանրապետությունը։ 2020-ի նոյեմբերի 9-ից հետո Իրանում չկա որևէ բարձրաստիճան պաշտոնյա, այդ թվում՝ այաթոլլան, նախագահը, արտաքին հարաբերությունների հարցերով նրանց խորհրդականները, ԱԳ նախարարը, պատգամավորները, որոնք այս մասին չխոսեին։ Իրանում կա հատուկ պաշտոնյա, որն ամեն օր հետևում է Սյունիքում տեղի ունեցող քաղաքական իրադարձություններին և նախագահին զեկուցում այդ մասին։ Սյունիքում բացված Իրանի հյուպատոսությունից բացի՝ թիկունքում՝ Արաքսից այն կողմ, արդեն երկու տարի է՝ կանգնած է Իսլամական հեղափոխության պահապանների կորպուսի չորս դիվիզիա՝ մոտ 150 հազարանոց զորքով։ Զորավարժություններից մեկի ժամանակ նրանց ինքնաթիռներից մեկն անգամ անցավ Ադրբեջանի հետ սահմանի վրայով»,- նշեց քաղտեխնոլոգը:
Արմեն Բադալյանի կարծիքով՝ Ադրբեջանի հարձակման համար 2020-ի նոյեմբերի 9-ից հետո որևէ խնդիր չկար, կարող էր ճեղքել Սյունիքն ու հասնել Նախիջևան, բայց Իրանը փաստել է, որ Սյունիքն իր համար կարմիր գիծ է. «Իրանական գործոնն առայսօր զսպում է Ադրբեջանին։ Այս իշխանությանը բերել են այս խնդիրները լուծելու համար։ Բնականաբար, ովքեր եկել են, իրականացնում են հենց այս խնդիրները։ Տեղյա՞կ են նրանք այդ ամենին, թե՞ ոչ՝ այլ հարց է։ Աշխարհաքաղաքական կոնսենսուսն ավարտվել է 2014-ին, երբ կենտրոններից մեկը Ղրիմը վերադարձրեց հարազատ նավահանգիստ, մյուս կենտրոնն էլ չճանաչեց դա, և սկսվեց հակամարտություն միմյանց միջև։ Ավելին, այդ կոնսենսուսն ավարտվել էր դեռևս 2007-ին Մյունխենում Պուտինի ելույթով, երբ նա խոսեց իր երկրի պետական շահերի և դրանք չզիջելու մասին։ Դրան հաջորդեց վրաց-հարավօսական կամ վրաց-ռուսական հակամարտությունը, որը փաստորեն ռազմական ճանապարհով վերացրեց առկա կոնսենսուսը»:
«Երկու ձևավորվող միությունների միջև առաջին թեթև բախումը տեղի ունեցավ հենց Օսիայում, հաջորդը 2014-ին էր՝ արդեն Ղրիմում։ Իսկ ահա Հայաստանում ՌԴ-ն մշտապես առաջնորդվել է այն գաղափարով, որ ով էլ գա ՀՀ ղեկավար, իրենց առանցքից չի հեռանալու։ ՀՀ-ում ՌԴ դեսպանները մասնավոր զրույցներում մշտապես նշել են, որ ով էլ լինի ՀՀ ղեկավար՝ իր հայացքն ուղղելու է ՌԴ-ին, քանի որ իրենցից մեծ կախում ունի՝ թե՛ տնտեսական, թե՛ հացահատիկի, թե՛ գազային, թե՛ անվտանգության, թե՛ այլ հարցերում։ Հայաստանը որևէ տեղ չի փախնի՝ ահա՛ թե որ գաղափարն է իշխել ռուսական կողմում՝ ընդհուպ մինչև այս տարվա սեպտեմբերի 19-ը»,- ամփոփեց Արմեն Բադալյանը:
Մանրամասները՝ տեսանյութում։