Հենրիխ Մխիթարյանը՝ Հայաստանի 2023 թ. լավագույն ֆուտբոլիստ, բայց...

Հայաստանի ֆուտբոլի ֆեդերացիան ամփոփել է Հայաստանի 2023թ․ լավագույն ֆուտբոլիստի քվեարկության արդյունքները։ 
ՀՖՖ-ից տեղեկացնում են, որ հավաքելով 81 միավոր՝ 2023թ․ լավագույն ֆուտբոլիստ է ճանաչվել իտալական «Ինտերի» կիսապաշտպան Հենրիխ Մխիթարյանը։
Երկրորդ հորիզոնականը 48 միավորով զբաղեցրել է Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանը։
21 միավորով երրորդ հորիզոնականը զբաղեցրել է Հայաստանի ազգային հավաքականի և «Ալ Ֆաթեհի» կիսապաշտպան Լուկաս Սելարայանը, հաղորդում է aysor.am-ը: 
Քվեարկության արդյունքներին ամբողջությամբ կարող եք ծանոթանալ այստեղ։

Մեր կողմից նկատենք, որ Հենրիխ Մխիթարյանի ֆուտբոլային տաղանդն ըստ արժանվույն գնահատելով հանդերձ, այս «ճանաչումը» առնվազն զավեշտական է դիտվում: Մի կողմից, ՀՖՖ ներկայիս ղեկավարությունն ու այդ ղեկավարությանը գլուխ բերած փաշինյանական իշխանությունն ամեն ինչ արեց, որ Հենրիխ Մխիթարյանին դուրս մղեն հայկական ֆուտբոլից: Հիշեք, թե իշխանական ֆեյքերն ինչ կատաղի վայրահաչ էին տալիս թե ֆուտբոլիստի, թե նրա մտերիմների հասցեին: 
Իշխանության և իշխանական ՀՖՖ-ի հետ ասոցացվող այդ թիրախավորված մաղձանետումներն իրենց «արդյունքը» տվեցին: Հենրիխ Մխիթարյանը հայտարարեց, որ ավարտում է ելույթները Հայաստանի ազգային հավաքականում, որի ավագն էր, և կենտրոնանում է ակումբային կարիերայի վրա: Այն, որ փաշինյանական իշխանությունն ու փաշինյանական ՀՖՖ-ն վրեժ էին լուծում աշխարհահռչակ ֆուտբոլիստից, կռահելի էր նաև այն փաստից, որ հավաքականում ելույթներն ավարտելու մասին հայտարարությունից հետո Մելիքբեկյանի ֆեդերացիան անգամ «հրաժեշտի խաղ» չփորձեց կազմակերպել: 
Եվ խնդրեմ՝ Հենրիխ Մխիթարյանը ճանաչվել է Հայաստանի այս տարվա լավագույն ֆուտբոլիստ: Մյուս կողմից, հնարավոր է, քվեարկողներն այդպիսով իրենց խուլ բողոքն են արտահայտում նույն ՀՖՖ-ի օրերս վերընտրված ղեկավարության դեմ: 

Լուսանկարը՝ Հենրիխ Մխիթարյանի ֆեյսբուքյան էջից: