Հայաստանում ԱՄՆ արտակարգ և լիազոր դեսպան Ռիչարդ Մ. Միլս Կրտսերը և «Ֆուլեր տնաշինական կենտրոնը» Աղավնատուն գյուղում մասնակցել են տնօրհնեքի արարողությանը

Երևան, Հայաստան: Նոյեմբերի 25-ին Հայաստանում ԱՄՆ արտակարգ և լիազոր դեսպան Ռիչարդ Մ. Միլս Կրտսերը, ԱՄՆ դեսպանատան աշխատակիցները և «Ֆուլեր տնաշինական կենտրոնի» թիմը այցելեցին Արմավիրի մարզի Աղավնատուն գյուղում բնակվող Պետրոսյանների ընտանիքին՝ նրանց հետ կիսելու բնակարանամուտի ուրախությունը և մասնակցելու տնօրհնեքի արարողությանը։

Ընդամենը մի քանի ամիս առաջ էր, որ ԱՄՆ դեսպանատան թիմը և «Ֆուլեր տնաշինական կենտրոնը» միավորեցին ուժերը՝ օգնելու կառուցել տուն Պետրոսյանների ընտանիքի համար: Կամավորները իրականացրեցին հատակների բետոնացում՝ կատարելով հսկայական աշխատանք։
«Այս ընտանիքի առօրյա կյանքն ավելի լավը դարձնելու գաղափարը խթան է հանդիսացել ԱՄՆ դեսպանատան կամավորների և «Ֆուլեր տնաշինական կենտրոնի» թիմի համար՝ համախմբվելու այս հարկի ներքո»,-ասել է ԱՄՆ դեսպան Ռիչարդ Մ. Միլս Կրտսերը։ «Շատ ամերիկյան ընտանիքների համար կամավորությունը կենսակերպ է և պետք է կարողանալ շարունակել այդ ավանդույթը Հայաստանում»,- հավելել է նա։
«Մի քանի ամիս առաջ, երբ ավելի քան քսան կամավորներ օգնելու նպատակով միացան մեզ, ես չէի հավատում, որ այսքան շուտ կկարողանանք տեղափոխվել մեր գեղեցիկ տուն։ Ես շատ երախտապարտ և երջանիկ եմ իմ տանը հյուրընկալելու այն մարդկանց, ովքեր դժվարին պահին եղել են մեր կողքին։ Նրանք մեր երազանքը իրականություն դարձրեցին։ Շնորհակալություն»,- իր երախտիքի խոսքը հայտնել է տիկին Պետրոսյանը։
«Մեր համագործակցությունը Հայաստանի ԱՄՆ դեսպանատան հետ շարունակական է։ Այս համագործակցությունը ևս մեկ անգամ ապացուցում է , որ մարդասիրությունը սահմաններ չի ճանաչում։ Երբ մարդիկ միավորում են իրենց ուժերը բարի կամքով և սիրառատ սրտով, ամեն ինչ դառնում է հնարավոր։ Արդյունքը այս մարդկանց երջանկությունն է»,- ասել է «Ֆուլեր տնաշինական կենտրոնի» նախագահ Աշոտ Եղիազարյանը:

Հայաստանի «Ֆուլեր Տնաշինական Կենտրոնը» բարեգործական հասարակական կազմակերպություն է, որն աջակցում է Հայաստանի և Արցախի հանրապետություններում ցածր եկամուտ ունեցող ընտանիքներին կառուցել և վերանորոգել պարզ, հարմարավետ և մատչելի տներ՝ տալով նրանց երկարաժամկետ, անտոկոս փոխառություններ, ինչպես նաև իրականացնում է տնազոhւրկների շահերի պաշտպանություն՝ դարձնելով այն խղճի հարց և գործելու մղում։ Ամենամսյա ետվճարներից կազմվում է շրջանառու ֆոնդ և օգտագործվում այլ ընտանիքներին աջակցելու նպատակով՝ այսպիսով դառնալով համայնքային զարգացման կայուն ֆինանսական հիմք։ Առ այսօր կազմակերպությունն աջակցել է ավելի քան 600 ընտանիքների:

Լրացուցիչ տեղեկությունների համար կարող եք այցելել՝ www.fcharmenia.org կամ գրել [email protected] էլ հասցեին:

«Ֆուլեր Տնաշինական Կենտրոն» ԲՀԿ

Կոմիտաս 59, Երևան 0014, ՀՀ

[email protected]

Հեռ.՝ +374 10 20 43 90