Փաշինյանը հիմա իրեն ո՞նց է պահելու, դրանից է կախված մեր ֆիզիկական անվտանգությունը. քաղաքագետ (տեսանյութ)

Հասկանալու համար, թե, ի վերջո, ինչ են ուզում մեզնից Թուրքիան և Ադրբեջանը, բավական է կարդալ սեպտեմբերի 18-ի Շահրամանյանի ստորագրած փաստաթուղթը՝ Արցախ բառը փոխարինելով Հայաստան բառով։ Այս մասին NEWS.am -ի թղթակցի հետ զրույցում ասել է քաղաքագետ Բենիամին Մաթևոսյանը։
Ըստ նրա, Նիկոլ Փաշինյանը հիանալի հասկանում է, որ իր վարած քաղաքականությունը հանգեցնում է պետականության փլուզման։
«Հայաստանին ստիպել են ապագայում ևս Արցախի խնդրից հրաժարվելու փաստաթուղթ ստորագրել։ Սեպտեմբերին Արցախի դեմ Ադրբեջանի լայնածավալ ագրեսիայի սկսվելուց մի քանի օր առաջ հեռախոսազրույց է տեղի ունեցել Փաշինյանի և Էրդողանի միջև։ Այնուհետեւ ադրբեջանական և թուրքական լրատվամիջոցներում հաղորդագրություն է հայտնվել, որ Արցախում տեղի ունեցող իրադարձությունները մտահոգություն են առաջացնում նաև պաշտոնական Երևանում։ Ընդ որում, Հայաստանի իշխանությունները դա չհերքեցին»,- նշել է նա։
Ըստ Մաթևոսյանի,   բոլոր այս գործընթացները պատահական չեն, նպատակաուղղված քաղաքականություն է տարվում։
Նա հիշեցրել է, որ Թուրքիան և Ադրբեջանը վաղուց պահանջում են հրաժարվել հայկական պետության խորհրդանիշներից, մասնավորապես՝ զինանշանի վրայի  Արարատի պատկերից։
«Բայց եթե նույնիսկ հրաժարվենք մեր զինանշանից, օրհներգից, Անկախության հռչակագրից, փոխենք Սահմանադրությունը, դա չի փոխի Բաքվի և Անկարայի մոտեցումները Հայաստանի նկատմամբ։ Նրանք ձգտելու են քանդել մեր պետականությունը»,- վստահ է փորձագետը։
Նա ընդգծել է, որ իշխանությունները ոչնչացրել են Հայաստանի անվտանգության հիմնասյուներից մեկը․ Արցախը հանձնվել է թշնամուն, իսկ վստահությունը պետական ​​կառույցների և պաշտոնյաների նկատմամբ զրոյական է։
Քաղաքագետի գնահատմամբ, Հայաստանի հետ նույնն են անում, ինչ Արցախի հետ, երբ Արցախը մենակ մնաց Ադրբեջանի դեմ, Հայաստանին տանում են նույն ճանապարհով։