Արմեն Գրիգորյան. «Չեմ կարծում, որ եթե ԵՄ-ն հրաժարվի պայմանագրից՝ ՀՀ-ում մարդու իրավունքների լայնածավալ խախտումներ արձանագրվեն»

Նախկին փորձը հուշում է, որ միշտ էլ հնարավոր է, որ ինչ-որ բան փոխվի: Այս մասին ասել է քաղաքագետ Արմեն Գրիգորյանն «Ազատություն» ռադիոկայանի եթերում՝ անդրադառնալով ՀՀ-ԵՄ Համապարփակ և ընդլայնված գործընկերության համաձայնագրի՝ այսօր նախատեսվող ստորագրմանը:

Նրա կարծիքով՝ համաձայնագրի չստորագրման հավանականությունը մեծ չէ, բայց կարող է ստորագրվել, հետո պարտականությունները կատարելուց հրաժարվել:

«Չեմ կարծում, որ եթե Եվրամիությունը հրաժարվի պայմանագրից՝ Հայաստանում պետք է մարդու իրավունքների լայնածավալ խախտումներ արձանագրվեն, բայց քանի որ Հայաստանի իշխանությունն իր պարտականությունները, պայմանավորվածությունները հաճախ չի կատարում, ապա այստեղ տեղին է «Երբեք մի ասա երբեք» ասույթը: Այստեղ ավելի շատ ընթացիկ իրադարձություններից է կախված, թե ինչ զարգացում կունենա այդ պայմանագիրը»,-ասել է քաղաքագետը:

Նա չի կարծում, որ սա երկարաժամկետ ասոցացման պայմանագիր է, որովհետև, մեծ հաշվով, պայմանագրի հիմնական թիրախը Հայաստանում բարեփոխումների կատարումն է, ոչ թե ավելի շատ Եվրամիության հետ ինտեգրումը, նույն տնտեսական բարեփոխումները, քաղաքական համակարգի բարեփոխումները, կրթության բարեփոխումները:

«Պայմանագիրը եվրոպական ինտեգրման չէ, բայց կարող է արգումենտ հնչել, որ հենց այդ բարեփոխումները կարող են հիմք լինել ինտեգրման, չնայած օբյեկտիվորեն հաշվի առնելով Հայաստանի աշխարհաքաղաքական և ինտեգրացիոն պրոցեսները՝ դժվար թե սա դեպի Եվրոպա գնալու պայմանագիր լինի, այլ ավելի շատ Եվրոպայի հետ հարաբերությունները բարելավելու պայմանագիր է»,-ասել է Արմեն Գրիգորյանը:

Նրա բնորոշմամբ՝ փոփոխություններ լինելու են Հայաստանում. «Ամենակարևոր գործոնը Հայաստանում, որ կարող է բարեփոխումների ստարտ լինել, պետք է ապրիլից հետո Սերժ Սարգսյանի՝ իշխանությունից հրաժարվելը լինի, որովհետև այս պայմաններում բարեփոխումներ չիրականացնելը նաև դրանից է կախված»:

Քաղաքագետի ձևակերպմամբ՝ վերջին 10 տարվա ընթացքում, մեծ հաշվով, Սերժ Սարգսյանը բարեփոխումներ չի կատարել՝ նույնիսկ ունենալով Եվրամիության հետ գրեթե նույնատիպ նախագծեր, երբ Եվրամիությունն աջակցում էր Հայաստանին բարեփոխումներ անել:

«Պատմական փորձը ցույց է տալիս, որ բոլոր այն երկրները, որտեղ ինչ-որ մեկը երկար է մնում իշխանության, միշտ խնդիրներ են ունենում, վերցնենք մեր անմիջական հարևաններին. և՛ Պուտինը, և՛ Էրդողանը երբ եկել են իշխանության, բարեփոխումներ են իրականացրել, իրենց առաջին երկու ժամկետներում երկիրը դրել են զարգացման ռելսերի վրա, բայց հենց նպատակ են դրել երրորդ ժամկետում մնալու, արդեն խնդիրներ են առաջացել: Չեմ ասում, որ եթե ինչ-որ բարեփոխումներ են կատարում, կարող են մնալ, նույնիսկ հաջողություններ ունենալուց հետո ձախողումներ են ունենում, բայց եթե ձախողումից հետո փորձում են երրորդ ժամկետում մնալ, ապա մենք ավելի շատ ունենում ենք այնպիսի պատկեր, ինչպիսին Զիմբաբվեում է»,-ասել է նա: