Լևոն Քոչարյանը հուսով է, որ մյուս բոլոր քաղբանտարկյալները շուտով կլինեն ազատության մեջ

Ամեն անգամ տեսնում ենք, թե ինչ կարգի իրավական բեսպրեդել է լինում, բայց ամեն անգամ իրենք ապացուցում են, որ պատրաստ են և ունակ են ավելիին: Այս մասին ՔԿՀ-ից դուրս գալուց հետո լրագրողների հետ զրույցում նշեց Լևոն Քոչարյանը:
«Այս առումով, իհարկե, միայն ես չեմ: Դուք գիտեք, թե ինչքան ուրիշ մարդիկ կան, որ էլի շինծու, հիմար մեղադրանքներով գտնվում են բանտում: Ես իրենցից մեկն եմ և հույս ունեմ, որ բոլորն էլ շուտով կլինեն ազատության մեջ»,-ասաց նա:
Հարցին՝ մանդատը վերցրեց, որ կալանքից ազա՞տ արձակվի, Քոչարյանը պատասխանեց. «Ես հիմա չեմ պատրաստվում խոսել մանդատից: Ինձ համար այս ամեն ինչը անակնկալ էր, հիմա կարևորը, որ դրսում եմ, մնացածի մասին երևի հետո առիթ կլինի խոսելու»:
Դիտարկմանը, որ հնարավոր է դատախազը միջնորդի ԱԺ-ին իրեն զրկել անձեռնմխելիությունից, նա ասաց. «Ես սպասում եմ, որ այս իշխանություններն ամեն ինչի էլ ընդունակ են, որովհետև այն, ինչ ինձ հետ տեղի ունեցավ, սա ուղղակի զավեշտ էր»:
Նա նշեց, որ սովորական կալանավորի կարգավիճակում է եղել. «Պահման պայմանները սովորական են եղել, ինչպես բոլորինն է: Ամեն դեպքում ընկճվելու հարց չկար»:
Հարցին, թե արդյոք մանդատ վերցնելը վկայո՞ւմ է, որ մտնում եք քաղաքական դաշտ, նա ասաց. «Ունենք փաստ, մնացածի մասով հետո կխոսենք»:
Նշենք, որ ԿԸՀ որոշմամբ՝ ԱԺ «Հայաստան» դաշինքի մանդատը տրվեց հերթական հաջորդ թեկնածու Լևոն Ռոբերտի Քոչարյանին:
Ավելի վաղ հայտնել էինք, որ օրերս ԱԺ «Հայաստան» խմբակցության պատգամավոր Արմեն Չարչյանը ԱԺ նախագահին է ներկայացրել մանդատից հրաժարվելու դիմում։ «Հայաստան» դաշինքի համամասնական ցուցակում ընդգրկված հերթական հաջորդ թեկնածուները՝ Միհրան Թոմի Մադաթյանը, Անժելա Սեդրակի Նալբանդյանը, Գերասիմ Ավետիկի Վարդանյանը ինքնաբացարկի դիմումներ են ներկայացրել ԿԸՀ։
Ինքնաբացարկների դիմումներն օրենքով սահմանված կարգով նոտարական վավերացմամբ են եղել, հետևաբար վերջիններս նիստին ներկա չեն եղել։
Այսպիսով, պատգամավորական մանդատը փոխանցվել է «Հայաստան» դաշինքի համամասնական ցուցակի հերթական հաջորդ թեկնածու Լևոն Ռոբերտի Քոչարյանին։
Աղբյուր՝ Yerkir.am

Մանրամասները՝ տեսանյութում։