Կառավարությունը շնչավոր անձ չէ. ԿԳՄՍ նախարար

ՀՀ ԿԳՄՍ նախարար Ժաննա Անդրեասյանն ԱԺ-ում լրագրողների հետ զրույցի ժամանակ անդրադարձավ համաշխարհային ռեփեր Սնուփ Դոգի համերգի վերաբերյալ խոսակցություններին։ Պատասխանելով հարցին՝ կառավարությունը տրամադրություն ունի՞ համերգի համար, քանի որ Լեմկինի Ցեղասպանության կանխարգելման ինստիտուտը հոկտեմբերի 31-ին խոր մտահոգություն է հայտնել առաջիկա օրերին և շաբաթներին Ադրբեջանի կողմից Հայաստան ներխուժելու հավանականության մասին, նախարարը նկատեց․
«Ձեր հարցերի ձևակերպումներն ինձ զարմացնում են, Կառավարությունը շնչավոր անձ չէ, գործադիր մարմինն էլ զուրկ է տրամադրությունից»։
Դիտարկմանը՝ այդ դեպքում նախարարը տրամադրություն ունի՞ համերգի համար, Անդրեասյանը ևս մեկ անգամ շեշտեց․ «Կարծում եք՝ նախարարը պարտադիր տրամադրություն պետք է ունենա՞։ Եթե այդպես լիներ, շաբաթական մի քանի անգամ մշակութային միջոցառումների և սպորտային միջոցառումների տրամադրություն, դժվարանում եմ գտնել մարդ, որը կունենա։ Դա աշխատանքն է»։
Ըստ նրա՝ եթե Կառավարությունը նպատակահարմար է համարել կազմակերպել նշված համերգը, ապա դրա հաջորդ քայլը նոր ժամկետում այն նորից կազմակերպելն է։
Աղբյուր՝ tert.am