Տաթևն է, նա Արցախցի, է․ Կորցրել է Արցախը, պատերազմում՝ եղբորը․ նաև քաղբանտարկյալ է․ Լիլիթ Գալստյան

ԱԺ պատգամավոր Լիլիթ Գալստյանը գրում է․

«Տաթևն է, նա Արցախցի, է։ Կորցրել է Արցախը, պատերազմում՝ եղբորը, նաև՝ ուրիշ հարազատների։ Տաթևը կորցրել է ծննդավայրը, մենք բոլորս կորցրել ենք մեր Հայրենիքի մի կարևոր մասը։ Մեր բոլորի՝ իրական հայերի, սիրտը հիվանդ է, մեր վերքն՝ անբուժելի․․․ Մենք բոլորս պատանդ ենք, ուրացողի և հայրենադավի պատանդը։ Տաթևը նաև քաղաքական բանտարկյալ է։

Նա հիմա, առանց տեսակցության իրավունքի, գրեթե երկու ամիս, գտնվում է քրեակատարողական հիմնարկում։ Տաթևն առողջական խնդիրներ ունի, երեկ դարձյալ ուշագնաց է եղել։ Օրեր առաջ Տաթևի իրավունքների պաշտպանությամբ դիմել էի Հայաստանում ԵՄ գրասենյակի ղեկավար Վասիլիս Մարագոսին։

Պատասխան նամակում Վ․ Մարագոսին ասում է, թե ՄԻՊ-ի հետ կապի մեջ են, նրա իրավունքները պաշտպանված են․․․ Ավելացնելու բան չունեմ․ Արևմուտքն ասում է և պնդում, թե Հայաստանը տարածաշրջանի անշրջելի ժողովրդավարությունն է․․․ Ու մինչ Գազայի շարունակվող ցեղասպանության առջև աչքերը փակած Արևմուտքի հավաքական քաջալերանքով Հայաստանում ամրապնդվում է «ժողովրդավարությունը», մի ամբողջ ժողովուրդ էթնիկ զտման ու հայրենազրկումի է ենթարկվում, իսկ բոլորս՝ անարժանապատվորեն, շարունակում ենք մեր հաղթանակներն ուրացած, Հայոց պետականության ապագան կասկածի տակ դրած իշխանությունների պատանդը լինել։ Տաթև Վիրաբյանը միակ քաղաքական բանտարկյալը չէ․․․»։