Ադրբեջանը հող է նախապատրաստում Հայաստանի վրա նոր հարձակման համար. Փաշինյան

Եվրոպական խորհրդարանում քիչ առաջ ունեցած երկարաշունչ ելույթի ընթացքում Նիկոլ Փաշինյանը հայտարարել է, որ Ադրբեջանը հող է նախապատրաստում՝ Հայաստանի վրա նոր հարձակման համար: 
Նման հայտարարությունը, մանավանդ Նիկոլ Փաշինյանի շուրթերից, բավականին յուրահատուկ է հնչում, քանզի քանի դեռ Հայաստանում նրա գլխավորած ՔՊ-ն է իշխանությունը, Ադրբեջանը մշտապես ունենալու է «հող»՝ նորանոր հարձակումների և Հայաստանը կտոր-կտոր զավթելու համար: Կործանված Արցախն ու Փաշինյանի կողմից Արցախի ուրացումը դրա ամենից թարմ ու ցայտուն վկայությունն են: 
Ինչ վերաբերում է Փաշինյանի երկարաշունչ ելույթին, որի ամբողջական տարբերակը զետեղված է կառավարության պաշտոնական կաքյում , ապա ՔՊ-ի ղեկավարը նախ, բավականին մանրամասն հեքիաթասացությամբ ձանձրացրել է Եվրոպական խորհրդարանի պատգամավորներին՝ «հայկական ժողովրդավարության հրաշքի» մասին ճառով: Նա ասել է, որ եթե Հայաստանը ժողովրդավարություն չունենար, ապա վաղուց արդեն կորցրած կլիներ ինքնիշխանությունը, անկախությունը, պետականությունը: Միանգամայն զավեշտական է հնչում: Բազմաթիվ քաղբանտարկյալներ ունեցող, քաղաքական հետապնդումներ իրականացնող, իրեն տհաճ հարցեր տվող լրագրողների դեմ հետապնդումներ իրականացնող, Հայաստանը ոստիկանական «աբեզյաննիկի» վերածած Նիկոլ Փաշինյանը, խոսում է... ժողովրդավարության մասին: 
Այնուհետև Նիկոլ Փաշինյանը մի քանի անգամ մեղադրել է ՀԱՊԿ-ին ու Ռուսաստանին այն բանի համար, որ Հայաստանին ադրբեջանական ագրեսիայի դեմ միայնակ են թողել, ռուսական խաղաղապահներին էլ, որ ըստ էության, իրենց առաքելությունը չեն կատարել: 
Ելույթի ընթացքում Նիկոլ Փաշինյանը մասնավորապես նաև ասել է. «Ադրբեջանը հայտարարում է, թե Հայաստանի եւ Ադրբեջանի միջև սահման չկա, ինչը հակասում է Ալմաթիի հռչակագրին եւ վերը նշված պայմանավորվածություններին: Ադրբեջանը նաև երկիմաստություններ է պահում Խորհրդային Միության վերջին քարտեզները որպես դելիմիտացիայի հիմք ընդունելու հարցում, ինչը նույնպես որոշ փորձագետների հիմք է տալիս ենթադրելու, թե Ադրբեջանը Հայաստանի դեմ տարածքային պահանջներ ներկայացնելու և նոր ռազմական ագրեսիա նախաձեռնելու հիմքեր է ստեղծում»:
Քիչ անց նա նաև նշել է. «Ինչպես տեսնում եք, Հայաստանին տարածաշրջանի տրանսպորտային կոմունիկացիաների բացմանը խոչընդոտելու մեջ մեղադրելու որեւէ հիմք չկա եւ կան վերլուծություններ, որ պաշտոնական Բաքուն միջանցքային խոսույթը նենգափոխում է` տարածաշրջանում նոր պատերազմ հրահրելու, Հայաստանի նորանոր տարածքներ օկուպացնելու, կամ Հայաստանը շրջափակման մեջ պահելու համար»:
Սակայն, չնայած ամենին, կամ ոչնչի չնայելով, Նիկոլ Փաշինյանը վճռական է Հայաստանի տապանաքարը դնելու հարցում և հայտարարեց. «Բայց ի հեճուկս այս ամենի, մենք պետք է անսասան շարժվենք դեպի խաղաղություն: Դա անելու համար անհրաժեշտ է քաղաքական կամք եւ ես ու Հայաստանի կառավարությունը, խորհրդարանական մեծամասնությունն ունեն այդ քաղաքական կամքը: Մյուս կողմից միջազգային հանրությունը եւ Եվրամիությունը, մեր տարածաշրջանի երկրները մեզ պիտի աջակցեն, ամեն ինչ անեն այս հնարավորության օգտագործումը մեզ համար, Ադրբեջանի և Հայաստանի համար իրական դարձնելու նպատակով: Եվ հենց այս հարցում պիտի հայցեմ ձեր բոլորի շարունակական ուշադրությունն ու աջակցությունը՝ հատկապես այն սկզբունքների իրագործման հարցում, որոնց շուրջ, ինչպես արդեն ասացի, պայմանավորվածության ենք եկել Եվրոպական խորհրդի նախագահ Շառլ Միշելի եւ Ադրբեջանի նախագահի մասնակցությամբ»։
Փաշինյանը ելույթն ավարտեղ ժողովրդավարության վերաբերյալ բաժակաճառային ձևակերպումներով. «Եկեք շարունակենք կանգնած լինել ուս-ուսի՝ ժամանակները ավելի լավը դարձնելու հանձնառությամբ: Ինչպես ասացի, ես համոզված եմ, որ ժողովրդավարությունը կարող է ապահովել խաղաղություն, անվտանգություն, միասնություն, բարեկեցություն եւ երջանկություն: Եկեք միասին սա ապացուցենք: Կեցցե՛ ժողովրդավարությունը»:
Լուսանկարը՝ «Թերթ.ամ» կայքից: