«Թուրքն ու ադրբեջանցին Արցախը դատարկեցին, հիմա դուք եկել, մեզ մեր տներից բռնի ուժով դուրս եք հանում»

Կադրերը, որ ներկայացված shamshyan.com կայքից արվել են այսօր, հոկտեմբերի 5-ին: Սակայն այստեղ պատկերված է ոչ թե ընդդիմության բողոքի ակցիայի «ցրում» այսպես կոչված՝ «կարմիր բերետավորների կողմից, այլ վերջիններիս և Սիլիկյան թաղամասի մի հատվածի՝ քաղաքապետարանի կողմից ապօրինի հայտարարված տների բնակիչների «շփումը»: 
Ինչպես հաղորդում է Գագիկ Շամշյանի կայքը, Սիլիկյան թաղամասի «Սպանդարյան» գերեզմանների հարևանությամբ գտնվող սեփական տների բնակիչներըթույլ չէին տալիս, որպեսզի Երևանի քաղաքապետարանը քանդի 0-ից 20 տարվա ընթացքում կառուցված 25-ից ավելի տներ: Մի խոսքով, տնաքանդության քաղաքապետարանի ակցիան հանդիպել էր բնակիչների դիմադրությանը:  
Շամշյանի փոխանցմամբ՝ իրավիճակը լարվել է, և դեպքի վայր ժամանել ոստիկանության «կարմիր բերետավորները», որոնք մեծ թվով քաղաքացիների բռնի ուժով, մի քանիսին էլ՝ քարշ տալով, նստեցրել են ոստիկանական ավտոմեքենաները ու, այսպես ասած՝ «բերման ենթարկել»: 
Նույն աղբյուրի համաձայն, դեպքի վայր ժամանած շտապօգնության բժիշկների հերթապահ խմբերը մի քանի հոգու բուժօգնություն են ցուցաբերել, այդ թվում՝ «կարմիր բերետավորների»:
Ֆոտոլրագրող Գագիկ Շամշյանի հետ զրույցում քաղաքացիներն ասում էին.
«10, 15, 20 արի է՝ որ էս օձերով ու կարիճներով տարածքը մաքրել ենք աղբից ու տներ ենք կառուցել, ստեղծել նաև այգիներ: Օրինական ճանապարհով կոմունալ վճարումները կատարում ենք, ու հիմա, Երևանի քաղաքապետարանը, հավանաբար, ինչ-որ մեկին հաճոյանալու համար որոշել է, որ այս բոլոր տները ապօրինի են: Եթե ապօրինի են, ինչո՞ւ ենք հոսանքի, կոմունալի, աղբի և այլ ծառայությունների դիմաց վճարումներ կատարել: Բազմիցս դիմել ենք Երևանի մի քանի քաղաքապետերի, ովքեր մեզ ասում էին, թե հարցը կկարգավորվի՝ ի շահ բնակչի: Եթե կարգավորումը սա է, որ մոտ 25 տների բնակիչների տարիներով կառուցածը հողին եք հաասարեցնելու, ու մեծ թվով բնակիչների՝ այդ թվում՝ զինվոր պահող ընտանիքների, արդյո՞ք դա մարդկային մոտեցում է: Ամոթ է, հետո էլ ասում եք՝ արտագաղթ, էլ արտագաղթը ո՞նց է լինում: Թուրքն ու ադրբեջանցին Արցախը դատարկեցին, հիմա դուք եկել, մեզ մեր տներից բռնի ուժով դուրս եք հանում»:
Մանրամասնությունները՝ https://shamshyan.com/hy/article/2023/10/05/1247657
կայքում: