Գնացեք ապահով Բաքու, կամ հաճելի մի այլ մայրաքաղաք, կամ «Վարդաշեն», հե՛-ռա՛-ցե՛ք. Աղվան Վարդանյանը՝ Փաշինյանին

Կառավարություն-ԱԺ այսօրվա հարցուպատասխանի ժամանակ «Հայաստան» խմբակցության պատգամավոր Աղվան Վարդանյանը, խոսքն ուղղելով Փաշինյանին, նրան հորդորեց, որ նա էլ գնա «ապահով Բաքու, կամ հաճելի մի այլ մայրաքաղաք, կամ «Վարդաշեն» քրեակատարողական հիմնարկ: «Հեռացե՛ք»,-հորդորեց Աղվան Վարդանյանը, ով հիշեցնենք, 2018 թվականի մայիսի 8-ին, հակադրվելով իր կուսակցության (ՀՅԴ) որոշմանը, կտրականապես հրաժարվեց քվեարկել Փաշինյանի՝ ՀՀ վարչապետ դառնալու օգտին: 
Իսկ այսօրվա հարցուպատասխանի ժամանակ Աղվան Վարդանյանը մասնավորապես նշեց. «Այստեղից մեկն ասում էր՝ մեզ ասում են՝ մի փոքր իջեցրեք Արցախի հարցի նշաձողը եւ միջազգային լայն կոնսոլիդացիա կունենանք, մի փոքրը ինչքա՞ն էր, 10 սանտիմե՞տր, թե՞ կիլոմետր: Իջեցրել եք մինչեւ զրո կետ: Արցախում հայ չկա, ռազմաքաղաքական ղեկավարությունը, ձեր ամենօրյա խոսակից Արայիկն էլ, Բաքվի բանտում են:Հայաստանի  ինքնիշխանությունն էլ եք ահագին իջեցրել: Եթե մնաք, իջեցնելու եք մինչեւ զրո: Մնաք, երաշխավորում եմ, նոր ողբերգություն եք բերելու:
Առաջարկում եմ երեք տարբերակ՝ կամ դուք էլ գնացեք ապահով Բաքու, կամ հաճելի մի այլ մայրաքաղաք, կամ «Վարդաշեն»: Բարեկամական կարճ խորհուրդ՝ հե՛-ռա՛-ցե՛ք»։
Պատգամավորը նշեց, որ հարց չկար, միայն այդ կարճ խորհուրդն էր: 
Նիկոլ Փաշինյանը որոշեց արձագանքել, որի ընթացքում մասնավորապես ասաց. «Դուք դրոշներ եք դրել ձեր սեղանին, ամբողջ օրը առավոտից իրիկուն խոսում եք Լեռնային Ղարաբաղի մասին, բայց ձեր խոսույթի մեջ նույնիսկ հարգանք չկա։ Ասում եք՝ «ձեր խոսակից Արայիկը» այսինքն՝ մարդու էսօրվա վիճակը  եւ նախկին կարգավիճակը եւ ձեր ճառերը․․․ տեսնո՞ւմ եք, դոր դուք հարգանքի պրիմիտիվ արտահայտություն չունեք, այդ դրոշը ձեզ համար ընդամենը հերթական իրիկուն փաբում անցկացնելու նյութական միջոց ապահովել է։ Էդ որ մեզ ասում եք՝ գնացեք «Վարդաշեն», հայտարարում եք՝ մահապարտ ենք, դուք մեկ Հոլանդիայում եք, մեկ Իտալիայում եք, ինչքան ռեզորտներ կան Եվրոպայում ու Ասիայում բաց չեք թողնում ու էդ մահապարտություն գտա՞ք ըտեղ։ Ընդդիմադիր քաղաքական գործիչները ոչինչ, կարող են շատ բան ասել, մենք մինչեւ որոշակի սահման հանդուրժող ենք, բայց երբ սահմանն անցավ ում պետք է ուղարկել «Վարդաշեն»՝ կուղարկենք։ Ում պետք չի ուղարկել, կուղարկենք ոչ «Վարդաշեն»: Ինչ վերաբերում է Բաքու գնալու տրամաբանությանը, ապա ենթադրում եմ, որ այդքան վստահ ասում եք՝ գնալ-գալու ձեւերն ու ուղիները, կապուղիները լավ գիտեք, այդ թվում՝ ձեր քաղաքական ուժի ղեկավարի բազմամյա փորձի բերումով»։ 
Իր հերթին, արձագանքելով Փաշինյանին, Աղվան Վարդանյանը նշեց. «Բնականաբար, այլ բան ձեր տեսակից չէի ակնկալում՝ անձնական դաշտ մտնել: Երջանիկ եղեք, որ ես անձնական դաշտ չեմ մտնում, ինձ թույլ չեմ տալիս։ Բայց որ դուք կարող եք լինել բանսարկու ու զրպարտիչ, դա նորություն չի»:
Տեսանյութը՝ News.am կայքից: