ՄԱԿ-ականներն «ապշած են, թե ինչպես է տեղի բնակչությունը հանկարծակի լքել իր տները»

Ադրբեջանի կողմից (Ակնայով) Արցախ մեկնած ՄԱԿ-ի հումանիտար հարցերի համակարգման գրասենյակը նախօրեին մամուլի հաղորդագրություն է տարածել՝ իրենց առաքելության այցի արդյունքների վերաբերյալ: 
Նշվում է, որ Ստեփանակերտում ՄԱԿ-ի ներկայացուցիչները հանդիպել են բնակիչների հետ, ծանոթացել են առողջապահության ու կրթության ոլորտներում առկա վիճակին (ամայացած քաղաքում, դատարկ դպրոցներում ու բուժհաստատություններում-խմբ.): Նշվում է նաև, որ ըստ ՄԱԿ առաքելության՝ տարբեր գնահատականով Արցախում հայ բնակչության թիվն այս պահին հազիվ հասնում է հազար մարդու, թեպետ այդ թիվը ստույգ չէ: Դա ընդամենը գնահատական է: 
Հավելենք, որ ՄԱԿ-ի առաքելության այցի նպատակն իրավիճակին տեղում ծանոթանալն էր և ինչպես մնացած, այնպես էլ Արցախից հարկադրաբար հեռացած բնակիչների հումանիտար կարիքները գնահատելն էր։ Թե ինչպե՞ս են նրանք դա անելու Ադրբեջանի կողմից էթնիկ զտման ենթարկված Արցախում, այնքան էլ պարզ չէ: 
Տարածված հաղորդագրության մեջ նման բնորոշումներ չկան, փոխարենը նշվում է. «Առաքելությունն ապշած էր այն հանգամանքից, թե ինչպես է տեղի բնակչությունը հանկարծակի լքել իր տները, ինչը նրանց նաև տառապանք է պատճառել»։ Ի լրումն, ՄԱԿ-ի առաքելությունն ընդգծել է «կողմերի միջև վստահության ամրապնդման անհրաժեշտությունը՝ գիտակցելով, որ դա ժամանակ ու համատեղ ջանքեր է պահանջում»։ Նրանք, փաստորեն, ձևացնում են, թե ինչ-որ վստահություն կար «կողմերի միջև», այն մի հատ էլ ամրապնդելու կարիք կա, դա էլ ժամանակ ու ջանքեր է պահանջում: 
Այն բանից հետո, երբ Ադրբեջանի կողմից ցեղասպանության ոճիրն իրականացված է, տպավորույթուն է ստեղծվում, որ «միջազգային հանրությունը» որպես «բանից անտեղյակ» ներկայանալու և դասական երեսպաշտություն դրսևորելու նպատակ է դրել: Օրինակ, ՄԱԿ-ականները, պարզվում է, «ապշած են, թե ինչպես է տեղի բնակչությունը հանկարծակի լքել իր տները»: Մնում է ենթադրել, թե է՛լ որքան նրանք «ապուշ կկտրեին», եթե տեսնեին ադրբեջանական զինուժի կողմից սպանված հայ երեխաների, իրենց բնակավայրերում հոշոտված խաղաղ բնակիչների, սպանված կանանց ու ծերերի մարմինները:
Եթե ՄԱԿ առաքելության ներկայացուցիչները բարեհաճին գոնե թեթևակի հետևել ՄԱԿ-ի Անվտանգության խորհրդի՝ Արցախի հարցով հրատապ նիստի ընթացքին, ապա միգուցե այդքան «ապուշ չկտրեին», թե ինչու է «տեղի բնակչությունը հանկարծակի լքել իր տները»: