Ավանում ՀՀԿ-ական Ռոբերտ Սարգսյանի համար անձամբ դպրոցների ու մանկապարտեզների տնօրեններն են «դռնեդուռ» ընկնում

Ավան, Քանաքեռ-Զեյթուն համայնքներն ընդգրկող թիվ 1 ընտրատարածքում ԴԱՀԿ-ի նախկին պետ Միհրան Պողոսյանի և ՀՀ ԱԺ պատգամավոր, Տարոն Մարգարյանի աներորդի Ռոբերտ Սարգսյանի միջև քաղաքական և միջանձնային պայքարը նոր զարգացումներ է ստանում: 

ՀՀԿ ռեյտինգային ցուցակով առաջադրվելու և խորհրդարան անցնելու ցանկությունը, ինչպես նաև նրանց միջև առկա պայքարը մի շարք ռիսկային և հակաօրինական դրույթներ է պարունակում:

Նախորդ անգամ մենք անդրադարձ կատարեցինք Միհրան Պողոսյանի «նախընտրական գործունեությանը», այս անգամ կանդրադառնանք նրա քաղաքական մրցակից՝ Ռոբերտ Սարգսյանի ձայներ հավաքելու գործունեությանը:

Ի տրբերություն Միհրան Պողոսյանի, որը մեծ գումարներ է ներդրել պատգամավորի բաղձալի մանդատը ստանալու  համար, Ռոբերտ Սարգսյանը սկսել է վարչական ռեսուրսի օգտագործումից:

Zham.am-ի  հավաստի տեղեկությունների համաձայն, Ռոբերտ Սարգսյանը դիմել է ՊՈԱԿ-ի` այն է դպրոցների ու մանկապարտեզների անձնակազմի օգնությանը:

Այսպես՝ աշխատանքից հետո, մանկապարտեզների տնօրենների և դպրոցի աշխատակիցների մակարդակով այցեր են կատարվում Ավան համայնքի բնակիչների տներ և հորդորում քաղաքացիներին իրենց ձայները տալ Ռոբերտ Սարգսյանին:

Օբյեկտիվ լինելու համար նշենք, որ ի տարբերություն Միհրան Պողոսյանի բնակիչներից անձնագրերի տվյալներ դեռ  չեն պահանջում, բայց, ինչպես հաղորդում են մեր աղբյուրները, ամեն բան դեռ առջևում է. անձնագրի տվյալներ հավաքող «դավթարով» տիկնանց և տղամարդկանց այցերը   շատ սպասել չեն տա: Ի դեպ մեր աղբուրների պնդմամբ ընտրակեղծարարությամբ զբաղվող անձինք այս կամ այն ձևով կապ ունեն ՊՈԱԿ-ի (դպրոց, մանկապարտեզ և այլն) հետ:

Նշենք, որ քաղաքացիներին ուղղորդելը՝ ընտրական իրավունքի խախտում է, քանզի ոտնահարվում է քաղաքացու ազատ ընտրություն կատարելու հնարավորությունը, առավելևս որ պաշտոնապես ընտրական քարոզարշավի մասին դեռ չի հայտարարվել:

Մեր աղբյուրներն այդ համայնքում նշում են, որ որքան մոտենում են ընտրությունները, այնքան ավելի է լարվում իրավիճակը համայնքում: 

Կա մտահոգություն, որ Ավանում կարող է պայթյունավտանգ իրավիճակ ստեղծվել, և քաղաքացիներին պարտադրելու ու ուղղորդելու վարչական ռեսուրսի  հետ մեկտեղ սկսի ակտիվ գործունեություն ծավալել «թաղային կրիմինալը»:

Փաստացի՝ ՀՀ քաղաքացիները միայնակ են մնում վարչական ռեսուրսի ուժգնացող ճնշման և «թաղային կրիմինալի» դեմ, օր օրի զգալով առաջիկա խորհրդարանական ընտրություններում իրենց կամքի ազատ արտահայտման ոտնահարումը:

Zham.am