Ամենակարևորը Արցախի ԱԺ նախագահ Դավիթ Իշխանյանի ասուլիսից․
«Կա հստակ որոշում փակ պահելու, չօգտագործելու Ակնա (Աղդամ)-Ստեփանակերտ ճանապարհը»։
«Ադրբեջանը փորձում է իր «Կարմիր մահիկի» միջոցով Արցախից դուրս մղել «Կարմիր խաչի» գրասենյակը, իսկ միջազգային այդ կառույցի ներկայությունը մեզ համար առավելություն և հնարավորություն է, 30 տարի է, որ Կարմիր խաչի միջազգային կոմիտեի գրասենյակը Ստեփանակերտում գործում է որպես առանձին միավոր՝ ուղիղ Ժնևի ենթակայությամբ»։
«Ճակատամարտը տանուլ ենք տվել, բայց պատերազմը շարունակվում է։ Այն, ինչ այսօր Արցախում տեղի է ունենում, պատերազմի շարունակությունն է այլ բնույթով»։
«Այն հարաբերությունների դաշտը, որ այսօր ձևավորված է Արցախի ԱԺ-ի և Հայաստանի ԱԺ-ի միջև, անընդունելի է։ Այդ հարաբերությունները չպետք է դիտարկել անհատական, առանձին քաղաքական գործիչների հարաբերությունների համատեքստում, այլ որպես ինստիտուցիոնալ կապ։ Անցած 2 տարիների ընթացքում մենք ականատես էինք, ինչպես է Հայաստանը մեզնից հեռանում։ Մենք չպետք է թույլ տանք բոլոր «շահագրգիռ» կողմերին կազմաքանդել հարաբերությունները Արցախ ու Հայաստանի միջև»։
«Մենք ունենք բավարար ուժ և համապատասխան դերակատարներ Հայաստան-Արցախ-Սփյուռք եռամիասնությունը վերականգնելու համար։ Առաջին հերթին դրանում շահագրգված պետք է լինի և գործնական քայլեր իրականացնի Հայաստանի իշխանությունը։ Ցավոք, Հայաստանի իշխանությունները այդ ճանապարհին չեն»։
«Մեր տեսլականը մեր ինքնորոշման իրավունքի իրացման մեջ է, այդ տեսլականը մեր այն նպատակների մեջ է, որ մենք ամրագրել ենք 1988թ․-ին՝ մայր հայրենիքին վերամիավորվելու գաղափարով։ Սա ազգային ազատագրական պայքար է, մենք գտնվում ենք ազգային ազատագրական պայքարի շատ ծանր փուլի մեջ»։
«ՀՀ-ն իր անվտանգային երաշխավորի դերը զիջել է կամ գրեթե չկա, զրոյացված է։ Հայտնի է՝ թե ռուս խաղաղապահները ինչ թվակազմ ու դերակատարություն ունեն։ Եվ, անշուշտ, մեզ համար հիմնական և կարևոր անվտանգության երաշխիքը մնում է Արցախի Պաշտպանության բանակը։ Իսկ Արցախի Պաշտպանության բանակի գործունեության հզորացումն անհրաժեշտություն է»։
Հետևեք մեզ Facebook-ում