Փաշինյանն Արցախի նկատմամբ ատելություն է տարածել տարիներ շարունակ, սակայն երեկ դա արեց բացահայտ․ Մետաքսե Հակոբյան
Ասուլիսի ընթացքում Նիկոլ Փաշինյանը խոսում էր շատ հանդարտ, պատասխանում մանեւրելով, մինչեւ այն պահը երբ հարցեր ուղղեցին արցախցիները եւ նա այլեւս չկարողացավ իր մեջ կուտակված ատելությունը զսպել արցախցիների նկատմամբ։ Այս մասին NEWS.am-ի հետ զրույցում ասաց ԱՀ Ազգային ժողովի «Արդարություն» խմբակցության պատգամավոր Մետաքսե Հակոբյանը։
«Նիկոլ Փաշինյանը պատռեց իր դեմքը եւ պարզ ցույց տվեց՝ ինչու է եկել իշխանությանը։ Սարսափելի էր այդ ատելությունը։ Ինքը ոչ թե մեր հարցադրումներից էր ափերից դուրս գալիս, այլ մեր ձայնի մեջ տեսավ անկոտրում կամք հայրենիքը պաշտպանելու համար։ Ինքը հենց սա տանել չի կարողանում, սրա համար է ատում արցախցիներին։ Ինձ համար զարմանալի էլ չէր այդ պոռթկումը, Նիկոլ Փաշինյանն Արցախի նկատմամբ ատելություն է տարածել տարիներ շարունակ, սակայն երեկ դա արեց լիովին բացահայտ, եւ քաղաքացիները, որոնք դա չէին հասկանում, երեկ գիտակցեցին»,-ասաց Հակոբյանը։
Հակոբյանի խոսքով՝ Փաշինյանը պատերազմից հետո պարբերաբար սպառնում է Արցախին իրենց ուղարկվող օգնությամբ, երեկ էլ նույնն արեց, հայտարարելով, թե եթե իրենց կառավարությանը դավաճան են համարում, պետք է օգնությունից էլ հրաժարվեն։
«Այստեղ այլ կարեւոր դիտարկում էլ կա՝ հասկանո՞ւմ եք՝ որքան է լկտիացել վարչապետը, որ բյուջեն համարում է իր անձնականը, տեղավորել է իր գրպանում եւ ներկայացնում է, թե իր գրպանից է գումար տալիս Արցախին՝ որպես բարի կամքի դրսեւորում»,- նշեց պատգամավորը։
Անդրադառնալով Փաշինյանի հայտարարությանը, թե կինը՝ Աննա Հակոբյանը, պատերազմի ընթացքում Ստեփանակերտի նկուղներում սնունդ էր տալիս ծերերին՝ մինչդեռ Ստեփանակերտում շատ քիչ կանայք էին մնացել, Հակոբյանն արձագանքեց, որ պատերազմի ընթացքում օրը մի քանի անգամ այցելել է ապաստարաններ, սակայն երբեւէ չի տեսել Աննա Հակոբյանին։
«Հերթական սուտն էր, ես չգիտեմ՝ իր տիկինն ում էր բարոյական աջակցություն ցույց տալիս, բայց մենք մեկ բան հաստատ գիտենք՝ տիկին Աննան եղել է հայտնի բունկերում։ Այդ ժամանակ հացի բաժանելու կարիք չկար էլ, երբ Ստեփանակերտում անհնարին դարձավ հաց թխելը, Գորիսի քաղաքապետն ամեն օր հաց էր ուղարկում այստեղ։ Սկզբում շատ քիչ կանայք էին լքել քաղաքը, որովհետեւ մեծ մասի ամուսինները, եղբայրները ռազմադաշտում էին, բայց որոշ ժամանակ ստիպված էին երեխաների հետ դուրս գալ, որովհետեւ ուղղակի ռմբակոծվում էր Ստեփանակերտը։ Ի՞նչ էր առաջարկում՝ երեխաների հետ մնալ ռմբակոծության տա՞կ»,- ընդգծեց Մետաքսե Հակոբյանը։
Հետևեք մեզ Facebook-ում