Տեղի ունեցավ Փոստային վճարման պետական նշանների հարցերով խորհրդի նիստ
ՀՀ տրանսպորտի, կապի և տեղեկատվական տեխնոլոգիաների նախարարությունում փետրվարի 2-ին տեղի ունեցավ Փոստային վճարման պետական նշանների հարցերով խորհրդի նիստը, որը վարում էր նախարար Վահան Մարտիրոսյանը։
Նախարարը շնորհակալություն հայտնելով խորհրդի անդամներին նախորդ տարիների ընթացքում կատարած մեծածավալ աշխատանքի համար՝ հույս հայտնեց, որ անկախ խորհրդի կազմում լինելուց, հետագայում ևս կշարունակեն միասին աշխատել։ Հայաստանի Հանրապետությունում ֆիլատելիայի ոլորտի զարգացմանը նպաստելու համար նախարարը շնորհակալագրեր հանձնեց խորհրդի անդամներին։
Հաշվի առնելով նամականիշների դերը Հայաստանի ազգային, հոգևոր, մշակութային և պատմական ժառանգության հանրահռչակման և տարածման գործում՝ նիստի ընթացքում կարծիքներ հնչեցին նամականիշների թողարկման գործընթացն առավել ներառական ու թափանցիկ դարձնելու մասին։
Հաջորդիվ տեղի ունեցավ նաև Փոստային վճարման պետական նշանների հարցերով նոր խորհրդի անդրանիկ նիստը։
Շնորհավորելով խորհրդի նոր անդամներին՝ խորհրդի նախագահ, նախարար Վահան Մարտիրոսյանը հույս հայտնեց, որ նրանցից յուրաքանչյուրի մասնակցությունն ավելի արդյունավետ կդարձնի խորհրդի աշխատանքը։ Նախարարն ընդգծեց, որ առանձին հարցերի քննարկման ընթացքում խորհրդի աշխատանքներին կհրավիրվեն նաև համապատասխան մասնագետներ և փորձագետներ։
ՀՀ տրանսպորտի, կապի և տեղեկատվական տեխնոլոգիաների
նախարարության լրատվական ծառայություն
Հետևեք մեզ Facebook-ում