Բայրամովը ցինիկաբար է պատասխանել Զախարովայի կոչին

Ադրբեջանի ԱԳՆ ղեկավար Ջեյհուն Բայրամովը պատասխանել է Ռուսաստանի ԱԳՆ պաշտոնական ներկայացուցիչ Մարիա Զախարովայի՝ Լաչինի միջանցքն ապաշրջափակելու կոչին, տեղեկացնում են ադրբեջանական ԶԼՄ-ները։

Վերջին երկուսուկես տարվա, ինչպես նաև 30-ամյա «զավթման» ընթացքում Ադրբեջանը տասնյակ, հարյուրավոր, անգամ հազարավոր տարբեր կոչեր է լսել, հայտարարել է Բայրամովը։

«Իհարկե, անհրաժեշտ է լսել այդ կոչերը։ Կարևոր է վերլուծելը։ Եվ մենք դա անում ենք, համապատասխան արձագանք ենք տալիս։ Կարծում եմ, որ ժամանակը ցույց է տվել, որ զարգանալու և ճիշտ ուղղությամբ հարցերը լուծելու համար ադրբեջանական կողմը համակարգային միջոցներ պետք է ընդունի և ընդունում է։

Ադրբեջանական պետությունը միջազգային իրավունքի նորմերի և սկզբունքների համաձայն հարցերի լուծման իր տեսակետն ունի։ Մենք մեր քաղաքականությունը վարում ենք ոչ թե ղեկավարվելով ինչ-որ մարդկանց կոչերով, այլ ելնելով մեր ազգային շահերից։ Մենք համոզված ենք, որ այդ քաղաքականությունը դրական արդյունքներ կունենա»,- ասել է Բայրամովը։

Այս պատասխանից դատելով, կարելի է եզրակացնել, որ այլ ժողովրդի, տվյալ դեպքում Լեռնային Ղարաբաղի 120 000 հայերի, ցեղասպանությունը բխում է Ադրբեջանի «ազգային շահերից»։

Մեկ այլ կարևոր եզրակացություն․ Բաքուն վերջապես բացահայտ ընդունում է Արցախի շրջափակումը։

Աղբյուր՝ NEWS.am