«Հայաքվե»-ն այսօր ստորագրահավաք կանցկացնի Գյումրիում․ Ավետիք Չալաբյան

Երեկ մենք հաջողությամբ մեկնարկեցինք «Հայաքվե»-ի ստորագրահավաքը Երևանում, այսօր կբացվի ստորագրահավաքը Գյումրիում, այնուհետև Վանաձորում, ապա մյուս մարզկենտրոններում և մարզերի խոշորացված համայնքներում, հայտնում է հասարակական գործիչ, նախաձեռնող խմբի անդամ Ավետիք Չալաբյանը․

«Երեկ ես բազմաթիվ հարցեր եմ ստացել «Հայաքվե»-ի մասին, որոնց ի պատասխան ստորև ներկայացնեմ մի քանի կարևոր փաստ՝

ա) «Հայաքվե»-ն սովորական ստորագրահավաք չի: Այն պարտադիր իրավական ուժ ունեցող օրենսդրական նախաձեռնություն է, որի նպատակը Արցախի հանձնումը քրեականացնելն է, և օրենքի ուժով այն արգելափակելը:

բ) «Հայաքվե»-ն տեղի է ունենում միայն թաղապետարանների և համայնքապետարանների տարածքում, որոնց հասցեները կցված են: Փողոցներում դրված տարբեր ստորագրահավաքների տաղավարները «Հայաքվե»-ի հետ կապ չունեն:

գ) «Հայաքվե»-ի համար ստորագրելու համար պարտադիր է ՀՀ անձնագրի կամ նույնականացման քարտի առկայությունը:

դ) ՀՀ բոլոր չափահաս քաղաքացիները, անկախ գրանցման վայրից (ներառյալ Արցախի գրանցմամբ), կարող են քվեարկել ցանկացած ստորագրահավաքի կետում:

ե) և վերջապես, «Հայաքվե»-ին մասնակցած բոլոր մեր համախոհները պարտադիր կերպով մասնակցության հավաստագիր են ստանում, որ կարելի է ներկայացնել Ֆեյսբուքի սեփական էջում, ինչպես նաև օգտագործել մեր հետագա միջոցառումներին մասնակցելու համար:

Շնորհակալ եմ բոլոր նրանց, ովքեր արդեն մասնակցել են «Հայաքվե»-ին, և սիրով սպասում ենք մեր բոլոր արժանապատիվ համախոհներին ստորագրահավաքի կետերում»,- գրել է նա։