Ում է ենթարկվելու ոստիկանությունը Սահմանադրական բարեփոխումներից հետո
«ՀՀ 2018թ. պետական բյուջեի մասին» ՀՀ օրենքի նախագծի նախնական քննարկմանը փոխոստիկանապետ Վարդան Եղիազարյանի զեկույցը «Ելք» խմբակցության պատգամավոր Էդմոն Մարուքյանն աննախադեպ որակեց, քանի որ, ըստ նրա, բացահայտում արվեց, որ ոստիկանությունը Սահմանադրական բարեփոխումներից հետո կենթարկվի վարչապետին:
«Երկար ժամանակ սպասում ենք, բայց դեռևս Կառավարության մասին օրենքը չկա, Սահմանադրական բարեփոխումներ իրականացնելուց հետո հայտարարություններ էին հնչում, որ անցնում ենք խորհրդարանական կառավարման և չեն լինելու կառավարությանն առընթեր մարմիններ, բոլոր մարմինները հաշվետու են լինելու խորհրդարանին: Դուք զեկույցում նշեցիք, որ զարգացման ծրագրում նախատեսվում է, որ ոստիկանությունը ենթակա է վարչապետին, Ձեր խոսքից եմ ասում: Այսինքն՝ ըստ էության որևէ մեկը չի պատրաստվում առընթեր մարմինները դարձնել նախարարություններ և բերել խորհրդարանական հաշվետվության դաշտ»,-ասաց նա:
Նիստը վարող, Անվտանգության հարցերով հանձնաժողովի նախագահ Կորյուն Նահապետյանը տեղից արձագանքեց, թե դա վերջնական չէ: Մարուքյանը հավելեց, թե վերջնական է:
«Ինչպիսի՞ մարմին է վարչապետին ենթակա մարմինը, որը խորհրդարանում հաշվետու չի լինում»,-հարցրեց նա:
Վարդան Եղիազարյանը նշեց, որ դա ծրագրային դրույթ չէ, այլ զուտ տեսլական է, որը տեսնում են ոստիկանության տեսանկյունից: «Բայց Սահմանադրությունում հստակ գրված է, որ կան նախարարություններ, կառավարության ենթակա և վարչապետին ենթակա մարմիններ, Սահմանադրության շրջանակներում է: Իհարկե, որոշողը մենք չենք, դուք եք, ղեկավարությունը, մենք պատրաստ ենք ցանկացած ձևաչափով աշխատել, բայց կարծում ենք` կառույցը կմնա ներկայիս ոստիկանական համակարգի տեսքով, իհարկե, ոստիկանության օրենքի մշակման տեսլականով»,-ասաց նա:
Հետևեք մեզ Facebook-ում